Telegram`даги Troll.uz каналида чет эллик сайёҳнинг «Афросиёб» поездида эконом классдан вип классга жойини ўзгаритириш учун поезд бошлиғига қўшимча пул бергани ҳақида видео эълон қилинди.
Унда эркак поезднинг эконом классдаги ўрнини 10 долларга сотиб олгани, яна 15 доллар тўласа, жойи вип классга ўзгартириб берилиши таклиф қилингани ва бунга рози бўлгани ҳақида гапирган.
«Ўзтемирйўлйўловчи» АЖ матбуот хизмати ҳолат юзасидан муносабат билдираркан, воқеа 6 июль куни бўлиб ўтганини маълум қилди.
Таъкидланишича, 10 июль куни поезд бошлиғи мазкур ҳолат сабабли лавозимидан озод этилган. Вагон кузатувчиларига «бу каби ҳодисалар қайтарилмаслиги бўйича тегишли йўриқномалар билан тушунтириш ишлари олиб борилган».
«Ҳозирги кунда юқори тезликда ҳаракатланувчи „Афросиёб“ электропоездларининг барчасида ишчи гуруҳ томонидан текширув амалга оширилмоқда», — дейилади хабарда.
Эслатиб ўтамиз, Ўзбекистонда 20 октябрдан маҳаллий поездлар чипта нархлари кўтарилади. Хусусан, йўловчи поездлари чипта нархларининг тариф қисми 50 фоизга, «Афросиёб» электропоездлари чипталари эса 100 фоизга оширилади.
