Қатар қайтиш чиптасига эга ва хорижга чиқиш паспортининг амал қилиш муддати 6 ойдан кам қолмаган Ўзбекистон фуқаролари учун 30 кунлик визасиз режимни жорий қилди.
Мамлакат ҳукуматининг электрон виза беришга мўлжалланган порталида Ўзбекистон ушбу давлатга визасиз кириш мумкин бўлган 101 та давлат қаторида турганини кўриш мумкин.
Шу йилнинг июнь ойида Ўзбекистон Қатар фуқаролари учун 30 кунлик визасиз режим жорий қилганди.
Ўзбекистон президенти Шавкат Мирзиёев октябрь ойи бошида Доҳада Қатар амири билан музокаралар ўтказган. Ўшанда мамлакатлар ўртасида қатор ҳужжатлар имзоланган. Доҳада Ўзбекистон элчихонаси очилган.
Аввалроқ «Газета.uz» мухбири Easybooking компанияси томонидан ОАВ ходимлари учун Қатар пойтахти Доҳага уюштирилган бир ҳафталик инфо-турда бўлиб қайтганди. Ушбу сафардан тайёрланган фоторепортаж билан бу ерда танишиш мумкин.
