АҚШга амалий ташриф билан борган Шавкат Мирзиёев 18 сентябрь куни Нью-Йоркда АҚШ-Ўзбекистон савдо палатаси раиси Кэролин Лэмм билан учрашув ўтказди. Бу ҳақда Ўзбекистон президенти матбуот хизмати маълум қилди.
Учрашувда GE Healthcare, Oppenheimer, Cerberus, CNH ва Cintana корпорациялари раҳбарлари ҳам иштирок этди.
Ўзбекистон раҳбари учрашув иштирокчиларини АҚШ-Ўзбекистон савдо палатаси ташкил этилганининг 30 йиллиги билан табриклаб, ушбу тузилманинг икки томонлама савдо-иқтисодий ва инвестициявий ҳамкорликни кенгайтиришдаги муҳим ролини таъкидлади.
Палатага аъзо компанияларнинг умумий сони (ҳар икки мамлакатдан) 50 тага етди. Улар орасида GM, General Electric, Google, P&G ва бошқалар каби гигантлар бор.
Учрашувда АҚШ бизнесининг мамлакатимиздаги фаолиятини кенгайтириш борасидаги аниқ режалари муҳокама қилинди. Якунда қўшма лойиҳаларни амалга ошириш бўйича «йўл харита»ларини қабул қилишга келишиб олинди, дейилади хабарда.
Шавкат Мирзиёев учрашувда иштирок этган компания раҳбарлари билан ҳам алоҳида музокаралар олиб борди.
Хусусан, у GE Healthcare компаниясининг Европа, яқин Шарқ ва Африкадаги президенти ва бош ижрочи директори Роб Уолтон билан учрашди.
Жаҳон саноат гиганти Роб Уолтон Ўзбекистонда тиббий маълумотлар миллий архивини яратишда иштирок этиш ниятида. Шунингдек, компания Ўзбекистон корхоналари билан инвестиция ва технологик ҳамкорликни, шу жумладан, замонавий юқори технологияли ускуналарни етказиб бериш ва маҳаллийлаштириш лойиҳаларини кенгайтиришни режалаштирмоқда.
Соғлиқни сақлаш соҳасида эса кардиографлар ишлаб чиқариш, скрининг дастурлари ва ахборот кардио тизими ишга туширилиши белгиланди.
Oppenheimer бошқарувчи директори Жон Тонелли билан учрашувда 36 млрд долларлик активлари билан ушбу йирик инвестиция банкининг капиталини жалб қилган ҳолда Ўзбекистонда лойиҳаларни амалга ошириш истиқболлари муҳокама қилинди.
Мамлакатда саноат қувватларини яратиш ва модернизация қилишнинг йирик лойиҳаларига хусусий инвестицияларни жалб этиш бўйича келишувлар белгилангани ҳақида хабар берилди.
Бунда гап биринчи босқичда тўқимачилик кластерларини ривожлантириш лойиҳаларини, қурилиш материаллари ишлаб чиқариш тармоғи корхоналарини ва Тошкентнинг инфратузилмавий ривожланишини молиялаштириш тўғрисида кетмоқда.
Бундан ташқари, кичик ва ўрта бизнесни қўллаб-қувватлаш учун инвестицияларни йўналтириш кўзда тутилган.
Шавкат Мирзиёев Cerberus вице-президенти Брайан Хук билан ҳам учрашув ўтказди.
Активлари 60 млрд доллардан ортиқ бўлган глобал инвестиция корпорацияси алоқа, тоғ-кон саноати, транспорт ва энергетика инфратузилмасини модернизация қилиш лойиҳаларига тўғридан-тўғри сармоя киритишни режалаштирмоқда. Биринчи лойиҳалар йил охиригача ишга туширилади, дейилади хабарда.
Шавкат Мирзиёевнинг CNH компанияси вице-президенти Стив Надерни билан учрашувида Ўзбекистоннинг қишлоқ хўжалиги машинасозлигидаги узоқ йиллик ҳамкори билан яна ҳамкорлик қилиш истиқболлари муҳокама қилинди.
Трансмиллий компания Case ва New Holland брендлари остида йўл қуриш ва қишлоқ хўжалиги техникасини ишлаб чиқаради. У тармоқдаги бир қатор саноат корхоналарини хусусийлаштириш ва модернизация қилиш, комбайн ва пахта йиғиш машиналарини ишлаб чиқариш ҳажмини кўпайтириш, шу жумладан, юқори қувватли тракторлар ишлаб чиқариш ҳамда лизинг тузилмаларига тўғридан-тўғри молиявий ресурслар ажратиш ниятида.
Аввалроқ президент ва Air Products компанияси раҳбари Сейфи Гасеми ўртасидаги учрашувда компания Ўзбекистонда умумий қиймати 10 млрд доллардан ортиқ бўлган янги инвестиция дастурини амалга ошириши маълум қилинганди.
Cintana асосчиси Дуглас Беккер билан музокаралар чоғида 2024 йилда Аризона штат университети билан ҳамкорликда Тошкентда Америка технология университетини очиш режалари муҳокама қилинди.
Шунингдек, Ўзбекистон президентининг 15 сентябрь куни АҚШга ташрифи арафасида Вашингтонда Ўзбекистоннинг қатор вазирлари, АҚШнинг 250 дан ортиқ компания ва банклари вакиллари иштирокида бизнес-форум бўлиб ўтди.
