UzAuto Motors 8 май куни соат 10:00 дан бошлаб аввалги шартномалардан чиқарилган Chevrolet Lacetti (Gentra), Damas ва Labo автомобиллари учун контрактацияни қайта очади, бу ҳақда компания матбуот хизмати хабар берди.
«UzAuto Motors мунтазам равишда аввалги автомобиллар хариди учун тузилган шартномалардан чиқарилган ҳажмларни контрактацияга таклиф этиб келмоқда. Шу муносабат билан 8 май куни соат 10:00 да 4 500 дона Chevrolet Lacetti (Gentra) автомобили учун контрактация очилиши режалаштирилган», — дейилади хабарда.
Барча автомобиллар учун шу заҳоти олиб кетиш имконияти билан шартнома тузиш мумкин бўлади. Компания, шунингдек, Damas ва Labo автомобиллари учун ҳам контрактацияни очади. Бунда автомобиллар нархи ўзгаришсиз қолади.
Бундан ташқари, UzAuto Motors автомобиль заводи яқин кунларда Chevrolet Cobalt автомобилини янгиланган модификацияда ишлаб чиқаришни бошлайди. Унда экстерьернинг қисман рестайлинги мавжуд бўлади. Янгиланган автомобиллардаги ўзгаришлар ва контрактация вақти ҳақида кейинроқ хабар берилиши таъкидланган.
Chevrolet Lacetti, Damas ва Labo автомобиллари учун шартнома тузиш фақат savdo.uzavtosanoat.uz сайти орқали амалга оширилиши мумкин. Telegram-бот ҳамда UzAvtosavdo иловаси навбатни кузатиш хизматини ҳамда мавжуд автомобиллар ҳақида маълумотни тақдим этади.
UzAuto Motors 2024 йил январидан Chevrolet Gentra (Lacetti) седанини ишлаб чиқаришни тўхтатганди.
