«Янги Тошкент» бош режасини ишлаб чиқишга жаҳон архитектура бюролари — Сингапурнинг Meinhardt, Британиянинг Foster + Partners ва Голландиянинг OMA компаниялари жалб қилинган. Бу ҳақда Ўзбекистон президенти Шавкат Мирзиёевнинг 20 июлдаги «Янги Тошкент»ни қуриш чора-тадбирлари тўғрисидаги қарорида сўз боради.
«Газета.uz» Meinhardt Group инжиниринг-инвестиция компанияси ҳамда Инвестициялар, саноат ва савдо вазирлиги ўртасида «Янги Тошкент» лойиҳасини ишлаб чиқиш ва амалга ошириш учун Лойиҳа-инжиниринг марказини ташкил этиш бўйича келишув имзолангани ҳақида ёзган эди. Компания шаҳарнинг биринчи босқичи учун 1 млрд долларлик бош режани ишлаб чиқиши керак.
Келишувга кўра, марказ февраль-март ойларида очилиши, апрель-май ойларида «Янги Тошкент» лойиҳасининг бош режаси концепциясини ишлаб чиқиш режалаштирилганди. Лойиҳанинг батафсил режасини ишлаб чиқиш июль-октябрь ойларида кутилганди.
Meinhardt Group — 1955 йилда ташкил этилган Сингапурдаги энг йирик муҳандислик ва инвестиция компанияси. У бутун дунё бўйлаб шу жумладан Малайзия, Бирлашган Араб Амирликлари, Буюк Британия, Мальдив ороллари, Қатар, Камбоджа, Вьетнам, Ҳиндистон ва бошқа мамлакатларда 510 та йирик инфратузилма ва саноат объектларини (лойиҳалар рўйхати) қуришда иштирок этган. Лойиҳалар орасида бир неча бор дунёнинг энг яхши аэропорти деб тан олинган Сингапурнинг Чанги аэропорти биринчи терминали қурилиши ҳам бор. Ходимлар сони 5000 киши.
Foster + Partners - бош офиси Лондонда жойлашган Британия архитектура фирмаси. 1967 йилда Норман Фостер томонидан асос солинган. Бир қатор мамлакатлар шаҳарлари учун бош режалар, хусусан, Бангкок яқинидаги турар-жой бинолари қурилиши бош режаси, Ҳиндистондаги ҳукумат шаҳрининг бош режаси, Грециядаги Элиникон бош режаси, Берлиндаги Рейхстаг биносини реконструкция қилиш лойиҳалари, Англиядаги Уэмбли ва Испаниядаги Камп Ноу стадионлари, Гонконгдаги HSBC банки биноси (ўша вақтда дунёдаги энг қиммат бино бўлган), Купертинодаги Apple кампуси, Буюк Британиядаги IBM штаб-квартираси ва бошқалар (рўйхат). Foster + Partners, шунингдек, Остонадаги Тинчлик ва келишув саройи, Хан Шатир ва Абу Даби Плаза биноларини ҳам лойиҳалаштирган.
OMA (Office for Metropolitan Architecture) — Нидерландиянинг архитектура, шаҳарсозлик ва маданий таҳлил билан шуғулланадиган дизайн бюроси (лойиҳалар рўйхати). 1975 йилда Лондонда ташкил этилган. ОМАнинг энг йирик шаҳарсозлик лойиҳалари — Лиллнинг тарихий марказига яқин жойлашган «Эролилль» ҳудуди (бош режаси — 1989−1994, амалга ошириш — 1990 йиллардан бери), Голландиянинг Алмере марказининг бош режаси (лойиҳа — 1994 йилдан, амалга ошириш — 1998−2007 йиллар), Германиядаги Цехе-Цолльферайн шахтасини қайта тиклаш режаси (2002, 2010 йилда амалга оширилган). Катта Москва лойиҳасини ишлаб чиқишда қатнашган (2012).
«Газета.uz» аввалроқ пойтахтдан шарқда Чирчиқ ва Қорасув дарёлари оралиғида «Янги Тошкент» ақлли шаҳри қурилишини ўз ичига олган Тошкентнинг бош режаси лойиҳаси ҳақида батафсил маълумот берган эди. У 20 минг гектар майдонни эгаллайди ва 500 минг кишига мўлжалланган. Бироқ 2045 йилгача бор-йўғи 6 минг гектар майдонни ўзлаштириш режалаштирилган. Ушбу ҳисоб-китоблар асосида ривожланиш ва қурилишларнинг истиқболли ҳудудлари, шунингдек, пойтахтни янги шаҳар билан боғловчи асосий йўллар схемалари ишлаб чиқилди. Президент 18 март куни «Янги Тошкент» қурилишига тамал тошини қўйди.
