«Тез ёрдам»нинг Андижон, Самарқанд, Жиззах ва Сурхондарё ҳудудий филиалларида «103 Med-data» автоматлаштирилган бошқарув тизими жорий этилди. Бу ҳақда Соғлиқни сақлаш вазирлиги маълум қилди.

Қайд этилишича, «Тез тиббий ёрдамнинг 2022 — 2023 йиллардаги чора-тадбирлар стратегияси»га кўра, ўтган 6 ой давомида Республика тез тиббий ёрдам маркази ҳудудий филиаллари сўнгги русумдаги моноблок, монитор, IP телефон, коммутатор ва сервер шкаф каби замонавий ахборот-коммуникация воситалари билан таъминланди.

«Қолаверса, бу йил Тошкент шаҳар тажрибасига асосан Андижон, Самарқанд, Жиззах ва Сурхондарё ҳудудий филиалларида тез тиббий ёрдам хизматининг „103 Med-data“ автоматлаштирилган бошқарув тизими жорий этилди. Фарғона, Бухоро ва Тошкент вилояти филиалларида эса ушбу амалиёт тест-синов режимида фаолият юритяпти», — дейди Республика тез тиббий ёрдам маркази директори Абдувоитжон Гафуров.

Тизимда:

  • тез тиббий ёрдам автомашиналарини бошқаришни мониторинг қилиш ва оптималлаштириш;
  • диспетчерлик хизматини реал вақтда бошқариш, таҳлил, маълумотнома ва ҳисоботларни автоматик яратиш;
  • ягона маълумотлар базасини шакллантириш;
  • қўнғироқларни тезкор рўйхатдан ўтказиш ва бемор ҳақида маълумот олиш;
  • ҳисобот ҳужжатларини яратиш ва кўриш имкони мавжуд.

Телеграмдан фойдаланасизми? Муҳим янгиликларни ўтказиб юбормаслик учун каналимизга аъзо бўлинг.

Мазкур тизим орқали қўнғироқларни қабул қилиш, хизмат кўрсатиш ва рўйхатдан ўтказишни самарали бошқариш мумкинлиги таъкидланган.