9 июль куни бўлиб ўтган сайловда Ўзбекистон президенти этиб қайта сайланган Шавкат Мирзиёев Олий Мажлис палаталарининг шанба куни бўлиб ўтган қўшма мажлисида қасамёд қабул қилиб, давлат раҳбари лавозимига қайта киришди. Маросим жонли эфирда узатилди.
Ўзбекистон президентининг муддатидан олдин ўтказилган сайловида овоз беришнинг якуний натижаларига кўра, Шавкат Мирзиёев 87,05% овоз билан ғалаба қозонди. Робахон Маҳмудова 4,43%, Улуғбек Иноятов 4,02%, Абдушукур Ҳамзаев 3,74% овоз тўплади.
Инаугурация Сенатнинг янги биносида (Ўзбекистон Ташқи ишлар вазирлигининг собиқ биноси) бўлиб ўтди. Маросим бошланишидан аввал Сенатнинг катта мажлислар залига жорий йилнинг октябрь ойида тасдиқланган штандарт (байроқ) ва президент белгиси киритилди.
Сўнг Шавкат Мирзиёев Ўзбекистон Конституцияси ва Қуръони Каримга қўлини қўйган ҳолда қасамёд қилди.
Конституциянинг 92-моддасига биноан, президент қуйидаги сўзларни айтди:
«Ўзбекистон халқига садоқат билан хизмат қилишга, республиканинг Конституцияси ва қонунларига қатъий риоя этишга, фуқароларнинг ҳуқуқлари ва эркинликларига кафолат беришга, Ўзбекистон Республикаси президенти зиммасига юклатилган вазифаларни виждонан бажаришга тантанали қасамёд қиламан».
Унинг ортидан қарсаклар янгради.
«Менга юксак ишонч билдириб, Ўзбекистон Республикаси Президенти этиб сайлаган барча юртдошларимга яна бир бор чин қалбимдан самимий миннатдорчилик билдираман. Муқаддас Ватанимиз тимсоли ва мустақиллигимиз рамзи бўлган Ўзбекистон Республикаси давлат байроғига, мадҳиямиз ва гербимизга, менга топширилган Президентлик Олий нишони ва байроғига юксак ҳурмат бажо келтираман», — деди Шавкат Мирзиёев.
Президент ҳозир инаугурация нутқини билан чиқиш қилмоқда.
