Нукусда 12 июнь куни 27 ёшли аёл оиласи билан яшаган уйнинг 4-қаватидан қулаб вафот этди. Бу ҳақда «Газета.uz» Бош прокуратура матбуот котиби Ҳаёт Шамсутдинов маълум қилди.
Аёлнинг жасадини турмуш ўртоғи топган, у эрталаб соат 5:40 да уйғонган ва ёнида хотини йўқлигини пайқаган. Ташқарига чиқиб, аёлини ошхона деразаси остида ҳушсиз ҳолда кўрган, тез ёрдам ва қариндошларини чақирган.
Аёл 2017 йилда турмуш қурган, 2018 ва 2021 йилларда ўғил ва қиз фарзандлар кўрган. 2022 йил сентябрда эгизак чақалоқлари касалликдан вафот этган, шундан сўнг, Бош прокуратура маълумотларига кўра, аёлнинг руҳиятида ўзгаришлар юз берган.
Ўлим сабабини аниқлаш учун тегишли экспертиза тайинланган.
