Ўзбекистон президенти Шавкат Мирзиёев топшириғига кўра тузилган махсус ишчи гуруҳ АҚШнинг «Оҳангаронцемент» цемент заводи ва унинг асосчиси Akkermann Cement CA`га қарши санкциялари билан боғлиқ муаммони ҳал қилиш устида ишламоқда. Бу ҳақда 4 май куни бўлиб ўтган матбуот анжуманида Марказий банк раиси Мамаризо Нурмуратов маълум қилди.
«Санкцияларга келсак, бу бизни жуда хавотирга солмоқда. У ерда («Оҳангаронцемент»да — таҳр.) 10 мингдан ортиқ киши ишлайди. Санкцияларни қўллаш [корхонанинг] ишини шу заҳотиёқ тўхтатиб туришни англатмайди. Биз бу борада АҚШ Молия вазирлиги, OFAC (АҚШ Молия вазирлигининг хорижий активларни назорат қилиш идораси — таҳр.) тузилмаси билан ишлаяпмиз. Муайян муддат берилган. Бу чекловлар уларнинг доллар билан ўтказган операциялари билан бевосита боғлиқ», — деди у.
Унинг сўзларига кўра, санкциялар ҳозирча миллий валютадаги операциялар ва маҳаллий банклар томонидан хизматлар кўрсатишга тааллуқли эмас.
«[Банклар ҳақида] хавотирлар ўринли. Хизмат кўрсатувчи банк иккиламчи санкцияларга дуч келиши мумкин. Президент топшириғига асосан ишчи гуруҳ тузилиб, OFAC билан ҳамкорликда муаммони ҳал қилиш устида ишламоқда», — деди у.
Марказий банк раҳбари «Оҳангаронцемент» мамлакатдаги энг йирик солиқ тўловчилардан бири бўлиб, маҳаллий аҳоли бандлигини таъминлаётгани, шу боис «Ушбу корхонанинг узлуксиз ишлаши биз учун муҳим» эканини таъкидлади.
Аввал хабар берганимиздек, Қўшма Штатлар Россия фуқароси бўлган Алишер Усмоновнинг USM холдинги таркибига кирувчи «Оҳангаронцемент» цемент заводи ва Akkermann Cement CA компаниясига қарши санкциялар жорий қилган эди. Европа Иттифоқи санкцияларида у Россия президенти Владимир Путиннинг «севимли олигархи» деб аталган.
АҚШ Ғазначилигининг Чет эл активларини назорат қилиш бошқармаси (OFAC) янги санкциялар рўйхатига киритилган бир қатор компаниялар, жумладан Akkermann Cement CA билан операцияларни 11 июлгача тугатиш учун лицензия берган.
2021 йил май ойида Кипрнинг Lamanka Enterprises компанияси «Оҳангаронцемент» заводи устав капиталидаги 84,197 фоиз улушини сотиб олган эди. Ўшанда битим суммаси 557,6 млрд сўмга баҳоланган. 2022 йил январь ойида Lamanka Enterprises ва Британия Виржиния оролларининг Giacinttar компаниялари «Оҳангаронцемент»даги улушларини 1,88 трлн сўмга сотганини эълон қилди. Кейинчалик Алишер Усмоновнинг USM холдинги томонидан ташкил этилган Akkermann Cement CA акциялар харидори бўлгани маълум бўлди.
Шунингдек, Қўшма Штатлар Ucell`да улушга эга бўлган ва Ўзбекистонда маркалаш тизими билан шуғулланувчи Digital Invest, шунингдек, Alfa Beta Creative ва GFK Logistic Asia компанияларига қарши ҳам санкциялар жорий қилди. Ўзбекистон фуқаролари ва маҳаллий фуқаролари ҳам чекловлар остида қолган.
