АҚШ Давлат департаменти ва Молия вазирлиги 12 апрель куни Россиянинг Украинага қарши уруши муносабати билан, шунингдек, АҚШ маълумотларига кўра, Россияга жорий этилган санкцияларни четлаб ўтишга ёрдам берган жисмоний ва юридик шахсларга қарши янги санкциялар эълон қилди. Янги санкция рўйхатига 20 та давлатнинг 120 нафар юридик ва жисмоний шахслари киритилган.
АҚШ Давлат котиби Энтони Блинкен ўз баёнотида АҚШнинг Буюк Британия билан келишилган ҳолда кўраётган чоралари россиялик энг бой миллиардерлардан бири, аллақачон АҚШ санкциялари остида қолган Алишер Усмоновнинг Россияга қўлланилган санкцияларини четлаб ўтиш тармоғига қаратилганини айтди.
Тадбиркор ўз компанияларининг аксарият қисмини назорат қиладиган USM Holdingъга қарши санкциялар жорий этилди, дейилади хабарда. Санкцияга учраган USM компаниялари орасида Россиянинг «Мегафон» уяли алоқа оператори, Россиянинг энг йирик темир рудаси ишлаб чиқарувчиси «Металлоинвест», шу жумладан «Металлоинвест»нинг Швейцария ва Бирлашган Араб Амирликларидаги шўба корхоналари ҳамда Россиядаги Удокан мис лойиҳаси оператори бор.
Аввал хабар берганимиздек, санкциялар рўйхатига (SDN List) Ўзбекистондан цемент ишлаб чиқарувчи «Охангаронцемент» ва унинг асосчиси Алишер Усмонов бўлган USM Holding компанияси томонидан ташкил этилган «Akkermann Cement CA» компанияси ҳам киритилган. АҚШ Молия вазирлигининг Чет эл активларини назорат қилиш бошқармаси (OFAC) янги санкциялар рўйхатига киритилган бир қатор компаниялар, жумладан Akkermann Cement CA билан операцияларни 11 июлгача тугатиш учун лицензия берди.
Санкция рўйхатига қуйидаги Ўзбекистон фуқаролари киритилган:
- Исмаилова Гулбаҳор Бурхановна — фуқаролиги сифатида Ўзбекистон, Россия ва Кипр кўрсатилган, Алишер Усмоновнинг синглиси. Акаси билан The Sister Trust компаниясини бирга бошқаради. Исмоилова, шунингдек, Европа Иттифоқи, Швейцария ва Буюк Британия санкциялари остида қолган. Зуннур Исмоилов билан биргаликда Тошкентдаги Федорович номидаги клиник санаторий асосчиларидан бири;
- Гулноз Зуннуровна Кочарова — Ўзбекистон, Россия ва Кипр фуқароси. Кипр Almenor Holdings директори сифатида рўйхатга олинган;
- Шоҳрух Олимжонович Носирхўжаев — Ўзбекистон фуқароси. У БААдаги Hamriyah Steel («Металлоинвест»га тегишли) пўлат прокат заводининг бош директори;
- Нарзиева Насиба Эркиновна — Ўзбекистон фуқароси, Шоҳрух Носирхўжаевнинг рафиқаси;
- Саодат Бурхоновна Нарзиева — Ўзбекистон фуқароси, Алишер Усмоновнинг синглиси ва Насиба Нарзиеванинг онаси. Аввалроқ у акушер-гинеколог бўлиб ишлаётгани ва тиббиёт соҳасида 30 йилдан ортиқ тажрибага эга эканлиги маълум қилинган эди;
- Натан Ададиевич Винер — Германия ва Россия фуқароси. Алишер Усмоновнинг ўгай ўғли. Москвада бир қатор компанияларга, шу жумладан консалтинг фирмасига эгалик қилувчи тадбиркор. Хабарда айтилишича, у Латвияда денгиз қирғоғида ҳашаматли кўчмас мулкка эга.
The Sister Trustъга тегишли бўлган ва Кайман оролларида жойлашган Кипрда рўйхатдан ўтган Almenor, Klaret Aviation ва Navis Marine компанияларига ҳам чеклов чоралари қўлланилган. Бундан ташқари, рўйхатга Усмоновга тегишли экани айтилаётган яна учта Кипр компанияси: Windfel, Savoler ва Miramonte Investments киритилган. Miramonte Investments («Металлинвест» билан биргаликда (41,9%)) Тошкент металлургия комбинати акцияларига эга.
Қўшма Штатлар Кипр фуқароси Деметриос Сергидесга ҳам санкциялар киритди. АҚШ расмийларига кўра, у Усмоновнинг маслаҳатчиси ва бизнесмен номидан молиявий масалалар билан шуғулланади. Вашингтон Сергидесни The Sister Trust`нинг ҳимоячиси (ишончли вакили) деб атайди.
SDN рўйхатига «Мегафон» илгари ўз эгаси USM Telecom`га улушини сотган Digital Invest ҳам кирди. Компания Ўзбекистон ҳукумати билан ҳамкорликда ташкил этилган Digital Holding`да 51 фоиз улушга эга. Digital Holding Ucell (Coscom) уяли алоқа оператори, Ўзбекистондаги CRPT Turon маркалаш тизимининг оператори ва телекоммуникация хизматларини кўрсатувчи «Первая Башенная компания» компанияси (Coscom билан биргаликда — 99%) ҳамда New Solutions компанияларига эгалик қилади.
Шу билан бирга, АҚШ Молия вазирлиги истисно қилди ва агар бу операциялар Тожикистон ёки Ўзбекистонда телекоммуникация хизматларини кўрсатишга қаратилган бўлса, «Мегафон» ёки Digital Invest фойдасига ҳар қандай битимлар, жумладан, Америка товарлари ва технологияларини сотиш учун муддатсиз лицензия берди.
РБК хабарига кўра, «Мегафон» АҚШ санкцияларини адолатсиз, ноқонуний ва асоссиз деб атади. «Биз миллионлаб мижозларга юқори ижтимоий аҳамиятга эга хизматларни тақдим этувчи тижорат компаниясимиз. Биз ушбу чекловларга мавжуд бўлган барча усуллар билан эътироз билдирмоқчимиз», — дея баёнот берди компания.
АҚШ Савдо вазирлиги Молия вазирлиги санкцияларидан ташқари бир қатор компанияларга, жумладан Ўзбекистоннинг иккита корхонаси, Alfa Beta Creative ва GFK Logistic Asia`га нисбатан экспорт чекловларини жорий қилди. Департамент маълумотларига кўра, улар Россия ҳарбий ва мудофаа саноати эҳтиёжлари учун Америка товарларини сотиб олиш учун санкцияларни четлаб ўтишга ҳаракат қилган.
Ўзбекистон Корхоналар ва ташкилотларнинг ягона давлат реэстри маълумотларига кўра, Alfa Beta Creative 2022 йил 6 июнь куни 2 миллион сўм устав капитали билан Тошкент шаҳрида рўйхатдан ўтган, таъсисчиси Светлана Каримовна Ҳайдари. Асосий фаолият тури бошқа офис техника ва жиҳозларнинг улгуржи савдоси.
GFK Logistic Asia 2018 йил 28 мартда ташкил этилган, устав капитали 200 миллион сўм. Қуруқликдаги транспорт хизматларини кўрсатади. Таъсисчилар — Алберт Абдусаматович Шукуров.
