Ўзбекистон 2023 йилнинг биринчи чорагида газ, кўмир, нефть ва нефть маҳсулотлари импортини кескин оширди. Бу президент ҳузуридаги Статистика агентлиги маълумотларида акс этди.
Уч ой ичида 152,9 миллион долларлик газ импорт қилинган, бироқ етказиб бериш ҳажмининг деярли ҳаммаси март ойига тўғри келган — 151,2 миллион доллар. Бу 2022 йилнинг январь-март ойларига нисбатан 2,6 баробар кўп, шунингдек, ўтган йил давомида ушбу хомашё импортининг ярмидан бироз кўпроқ (281,9 миллион доллар).
Январь ойида газ экспорти 3,7 миллион долларни, февралда 3,7 миллион долларни ва март ойида 20,4 миллион долларни ташкил этди. Шу билан бирга, Хитой божхона статистикасига кўра, Ўзбекистон Хитойга газ экспорт қилмаган. Катта эҳтимол билан қўшни давлатларга, жумладан, Қирғизистонга ёнилғи етказиб бериш амалга оширилган.
Январь-март ойларида Ўзбекистон 45,2 миллион долларлик (январда 13,2 миллион доллар, февралда 16 миллион доллар, мартда 16 миллион доллар) кўмир импорт қилди, бу ўтган йилнинг биринчи чорагига нисбатан 61,7 фоизга кўп.
Нефть ва нефть маҳсулотларини етказиб бериш ҳажми 43,3 фоизга ошиб, 510 миллион долларни ташкил этди (январда 135,1 миллион доллар, февралда 152,5 миллион доллар, мартда 222,4 миллион доллар).
Январь ойида Статистика агентлиги электр энергияси импорти ва экспорти бўйича маълумотларни эълон қилмади. Февраль-март ойларида Ўзбекистон 34,4 миллион долларлик электр энергиясини импорт қилган ва 18,9 миллион долларга экспорт қилган.
Шундай қилиб, Ўзбекистон ушбу энергия ресурсларини импорт қилиш учун 742,5 миллион доллар сарфлади, бу ўтган йилнинг биринчи чорагига нисбатан қарийб 2 баробар кўп.
Газ, электр энергияси ва кўмир импортининг ўсиши уларни маҳаллий ишлаб чиқаришнинг қисқариши фонида содир бўлмоқда. Аввал хабар берганимиздек, биринчи чоракда республикада газ қазиб олиш ўтган йилнинг шу даврига нисбатан 9,6 фоизга, март ойида эса 12,9 фоизга камайган. Уч ой давомида электр энергияси ишлаб чиқариш ҳажми 5 фоизга камайди. Иссиқлик энергияси ва кўмир ишлаб чиқариш ҳам камайган.
