Ўзбекистон президенти Шавкат Мирзиёев 7 сентябрь куни мамлакатдаги дипломатик миссиясини якунлаётган Америка Қўшма Штатлари фавқулодда ва мухтор элчиси Дэниел Розенблюмни қабул қилди, дея хабар берди давлат раҳбари матбуот хизмати.
Президент Дэниел Розенблюмнинг Ўзбекистон-АҚШ стратегик шериклик муносабатларини ривожлантиришдаги ҳиссасини қайд этди, дея таъкидланди хабарда.
«Кейинги йилларда конструктив сиёсий мулоқот йўлга қўйилди. Биргаликдаги саъй-ҳаракатлар билан ўзаро манфаатли савдо-иқтисодий ҳамкорлик кенгайиб бормоқда. Ўзаро савдо ҳажми ошмоқда, АҚШнинг етакчи компаниялари иштирокида қатор инвестиция лойиҳалари амалга оширилмоқда. Таълим ва соғлиқни сақлаш соҳаларида икки томонлама дастурлар жорий этилмоқда», — дейилади хабарда.
Ўзбекистон президентининг жорий йил август ойида қабул қилинган фармонига мувофиқ америкалик дипломат мамлакатнинг юксак давлат мукофоти — «Дўстлик» орденига сазовор бўлди.
АҚШ элчиси унинг фаолиятига берилган юқори баҳо учун самимий миннатдорлик билдириб, бундан буён ҳам мамлакатлар ўртасидаги кўп қиррали ҳамкорликнинг мустаҳкамланишини фаол қўллаб-қувватлашда давом этишини таъкидлади.
Эслатиб ўтамиз, июнь ойида Дэниел Розенблюм «Газета.uz»га интервью берган эди. Унда Америка ташқи сиёсатининг Ўзбекистондаги устувор йўналишлари, ислоҳотларнинг ютуқ ва камчиликлари, сўз эркинлиги ва мамлакат тараққиёти ўртасидаги боғлиқлик ҳақида сўзлаб берди.
Аввал хабар қилинганидек, Жонатан Ҳеник АҚШнинг Ўзбекистондаги янги элчиси этиб тасдиқланди.
