InterContinental Hotels & Resorts компанияси 2022 йил охиригача InterContinental Tashkent меҳмонхонаси очилишини эълон қилди. Меҳмонхона бренди 15 йиллик фаолиятдан сўнг 2012 йилнинг май ойида Ўзбекистонни тарк этганди. Ўша пайтда бу шаҳардаги ягона беш юлдузли меҳмонхона эди. Ҳозирда меҳмонхона International Hotel деб аталади ва у давлатга тегишли.
InterContinental Tashkent янги жойда — шаҳарнинг қоқ марказида UzTur Investment and Development томонидан барпо этилаётган Trilliant Business Park мажмуасида жойлашади. Меҳмонхонада 216 та хона, жумладан, 40 та махсус люкс ва 2 та президент хоналари бўлади.
Мажмуа Америка «яшил» иморатлар Кенгаши томонидан сертификатланган LEED Gold (Leadership in Energy and Environmental Design) бўлган мамлакатдаги биринчи лойиҳадир.
Меҳмонхонадан хорижий ва Марказий Осиё ошхонасидан иборат иккита ресторан, шунингдек, 2500 квадрат метрдан ортиқ конференция маркази жой олади.
1946 йилда ташкил топган InterContinental Hotels & Resorts дунё бўйлаб 200 дан ортиқ меҳмонхонага эгалик қилади.
