Республика махсус комиссияси қарорига кўра, 10 июндан бошлаб Ўзбекистонга туризм мақсадида ташриф буюрувчилар учун ўрнатилган вақтинчалик чекловлар бекор қилинади.
«Газета.uz»га Вазирлар Маҳкамаси матбуот хизматининг маълум қилишича, бу тартиб мамлакатга авиақатновлар, чегарадош темир йўл станциялари ва автомобиль ўтказиш чегара пунктлари орқали келаётган барча фуқароларга тааллуқли.
Комиссия қарори билан фуқаролардан Ўзбекистонга келишидан олдин манфий ПЗР тест, экспресс тест топшириши ва эмланганлик ҳужжатига эга бўлиши бўйича талаблар бекор қилинди.
Таъкидланишича, комиссия Ўзбекистонда коронавирус инфекцияси тарқалиши ва касалланишнинг динамик пасайиши, шунингдек дунё мамлакатларида эпидемиологик вазиятни эътиборга олиб, ЖССТнинг тавсиялари ҳамда Туризм ва маданий мерос вазирлиги, Санитария-эпидемиологик осойишталик ва жамоат саломатлиги хизматининг таклифларини инобатга олган ҳолда шундай қарорга келди.
