2022 йилнинг январь-апрель ойларида Ўзбекистонга қиймати 38,5 млн. АҚШ долларига тенг бўлган 124,8 минг тонна буғдой уни импорт қилинган. Бу Давлат статистика қўмитаси маълумотларида акс эттирилган.

Буғдой уни импорти ҳажми ўтган йилнинг мос даври билан солиштирилганда 22 минг тоннага ошган.

2022 йилнинг январь-апрель ойларида Ўзбекистон буғдой унини энг кўп импорт қилган давлатлар:

  • Қозоғистон — 122,8 минг тонна
  • Россия — 1,9 минг тонна
  • АҚШ — 50 тонна
  • Италия — 27 тонна
  • Ҳиндистон — 2 тонна
  • Франция — 1,8 тонна

Эслатиб ўтамиз, Ҳукуматнинг 31 мартдаги қарори билан Ўзбекистон апрель-июль ойларида Қозоғистондан 100 минг тонна 3-синф буғдойини (бир қисми ун) мақбул нархларда импорт қилишни режалаштирганди. Ички ва ташқи бозорлардаги вазиятдан келиб чиқиб, яна 500 минг тонна буғдой харид қилиш ҳам кўзда тутилган.

15 апрелдан бошлаб эса Қозоғистон буғдой ва ун экспортига чекловлар жорий этди. «Мазкур чора ички бозорда тақчиллик юзага келиши ва ун ишлаб чиқариш корхоналари зўриқишининг олдини олиш учун керак», — деганди мамлакат қишлоқ хўжалиги вазирининг биринчи ўринбосари Айдарбек Сапаров.

Ўзбекистон президенти Шавкат Мирзиёев 11 май куни бўлиб ўтган йиғилишда ғалла етиштириш, жумладан, буғдой нархини либераллаштириш борасидаги ислоҳотлар ҳақида эълон қилди. Унга кўра, 1 июндан ғаллани сотиб олиш ва сотишда бозор нархларига ўтилади.

Йиғилишдан сўнг, Молия вазирлиги буғдой ишлаб чиқаришдаги ислоҳотлар, яъни буғдой нархини эркинлаштириш ортидан ун ва нон нархларининг сезиларли ўзгаришини кутмаётганини маълум қилди. Молия вазирлиги департамент директори Тўлқин Мирзаевнинг таъкидлашича, бугунги кунда буғдой ва ун бозорининг 70−80 фоизи бозор нархларида шаклланмоқда. Қолаверса, давлат ижтимоий ҳимояга муҳтож аҳоли қатламларини қўллаб-қувватлаш чора-тадбирларини ишлаб чиқмоқда.