Сенатнинг ялпи мажлисида «Қурол тўғрисидаги қонунчилик такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида»ги Қонун кўриб чиқилди. Бу ҳақда Сенат ахборот хизмати хабар берди.
Амалдаги «Қурол тўғрисида»ги Қонун билан ўқотар қуролдан ташқари пневматик, газли, сигнал берувчи, тиғли, улоқтириш қуроли ва электрошок қурилмаларига эгалик қилишга рухсат берилган.
Бироқ ўқотар бўлмаган юқорида кўрсатилган қуролларга ноқонуний эгалик қилиш учун эса қонунчиликда жавобгарлик мавжуд эмас эди.
Яъни, ўқотар бўлмаган қуролга ноқонуний эгалик қилиш, яъни уйда сақлаш, кўча-кўйда олиб юриш, таълим муассасаларига олиб бориш ва ҳоказо ҳолатларда қурол эгаси ундан турли жиноий мақсадларда фойдаланмаслигига «кафолат» йўқ.
Шу боис, Сенатнинг ялпи мажлисида муҳокама қилинган Қонун билан амалдаги 2 та кодекс ва 6 та қонунга ўзгартишлар киритиш назарда тутилмоқда:
- қурол ва унинг ўқ-дорилари муомаласини давлат томонидан тартибга солиш ва назоратни амалга ошириш функциялари Миллий гвардиядан ички ишлар органларига ўтказилмоқда;
- ўқотар бўлмаган қурол билан қонунга хилоф равишда муомалада бўлиш ёки қурол муомаласи қоидаларини бузганлик учун жиноий ва маъмурий жавобгарликлар назарда тутилмоқда;
- Ўзбекистон Республикаси фуқароларининг фуқаровий ов қуролини ва унинг ўқ-дориларини олиш ҳуқуқига эга бўлиш учун ёш цензи (чегараси) йигирма беш ёш этиб белгиланмоқда (амалдаги қонунчиликда йигирма бир ёш);
Бундан ташқари, фуқаровий қурол ва унинг ўқ-дориларини ҳадя этилишини тақиқлаш назарда тутилмоқда.
Қонун сенаторлар томонидан маъқулланди.
Эслатиб ўтамиз, Ўзбекистонда ов қуролига эгалик қилишнинг энг кам ёшини 21 ёшдан 25 ёшгача ошириш таклифи дастлаб Қонунчилик палатасининг 8 февраль куни ўтказилган ялпи мажлисида кўриб чиқилган эди. Ушанда депутатлар қонун лойиҳасини биринчи ўқишда қабул қилганди.
