Марказий банк маълумотларига кўра, Ўзбекистоннинг олтин-валюта захиралари 2022 йил 1 март ҳолатида 35,36 млрд долларни ташкил этди. Бу 1 февраль ҳолатига нисбатан 935,6 млн долларга кўп демакдир.
Ялпи захираларнинг ортишида хорижий валютадаги захира активлар асосий ролни ўйнади. Ушбу захиралар ҳажми 1 февралда 12,545 млрд долларни ташкил қилган бўлса, 1 мартда 13,528 млрд долларгача 983 млн долларга ортган.
Олтин захираларининг физик ҳажми 700 минг унцияга, қиймати эса олдинги ойга нисбатан 50,4 млн долларга камайган. 1 март ҳолатида мамлакат олтин захиралари ҳажми 10,9 млн трой унцияни, қиймати эса 20,724 млрд долларни ташкил этган.
Иқтисодчи Отабек Бакировнинг ёзишича, Ўзбекистон олтин-валюта захиралари бўйича энг мустаҳкам ҳимояланган давлатлардан бири ҳисобланади. Унинг сўзларига кўра, Ўзбекистон Россия-Украина ўртасидаги можаро туфайли келиб чиққан вазиятдан фойдаланиб, 30 тоннагача олтин сотган бўлиши мумкин.
2021 йил ноябрь ойида Ўзбекистон дунёда энг кўп олтин сотган давлат бўлганди. Бу ойда мамлакат 21,5 тонна олтин сотган.
Эслатиб ўтамиз, 1 фераль ҳолатида мамлакатнинг олтин-валюта захираси 34,425 млрд долларни ташкил этиб, 1 январга нисбатан 713,9 млн долларга камайганди.
