Марказий банк маълумотларига кўра, Ўзбекистоннинг олтин-валюта захиралари 2022 йил 1 февраль ҳолатида 34,425 млрд долларни ташкил этди. Январь ойига нисбатан бу кўрсаткич 713,9 млн долларга камайган.
Ялпи захираларнинг камайишида хорижий валютадаги захира активлар асосий ролни ўйнади. Ой давомида валюта захирасининг ҳажми 532,6 млн долларга камайиб, 12,54 млрд долларни ташкил қилди.
Олтин захирасининг миқдори ўзгармаган, бироқ унинг қиймати пасайган. Олтин заҳираси 20,77 млрд долларга баҳоланган бўлса, йил бошида бу кўрсаткич 20,95 млрд долларни ташкил этди. Нарх жиҳатидан захиралар 175,1 млн долларга пасайди. 1 фераль ҳолатига кўра, Ўзбекистон олтин захирасининг миқдори — 11,6 трой унция ёки 360,8 тоннага тенг.
Ўзбекистоннинг 2021 йилдаги йиллик импорти 25,461 млрд долларни ташкил этган. Мамлакатнинг олтин-валюта захиралари эса импортнинг йиллик кўрсаткичидан анча кўпроқ. Халқаро ташкилотларнинг ривожланаётган давлатлар учун тавсияларига кўра, захиралар камида 3 ойлик импортни қоплаши керак.
Захиралар мамлакат учун «хавфсизлик ёстиғи» ҳисобланади. Улар салбий ташқи зарбаларга қарши ишлатилиши учун зарур ва захираларнинг етарлилиги бевосита ушбу зарбаларнинг табиатига ҳам боғлиқ.
Эслатиб ўтамиз, Бутунжаҳон Олтин Кенгаши Ўзбекистон 2021 йилнинг ноябрь ойида 21,5 тонна олтин сотиб, декабрь ойида 8,4 тонна олтин сотиб олганини маълум қилган эди.
