Республика махсус комиссияси қарори билан Ўзбекистонга киришда коронавирусга экспресс тест олиш тартиби бекор қилинди, деб хабар берди ССВ.
25 январдан хорижий давлатлардан Ўзбекистонга ташриф буюрувчиларнинг камида 48 соат олдин топширган коронавирус инфекциясига ПЗР тест натижаси бўйича манфий натижали маълумотнома мавжуд бўлган тақдирда, халқаро аэропортлар, темир йўл вокзаллари ва автомобиль (пиёдалар) ўтказиш чегара пунктларида ташкил этилган коронавирус инфекциясига экспресс-антиген тест топширишлари талаби бекор қилинди, дейилади хабарда.
Аввалроқ, Uzbekistan Airports матбуот хизмати Республика махсус комиссияси «омикрон» штамми аниқлангани муносабати билан 11 январдан Ўзбекистонга киришда коронавирусга қарши мажбурий тест топшириш тартиби жорий этганини маълум қилганди.
Тест топшириш нархи эса сўм эквивалентида 5 АҚШ доллари миқдорида, талабаларга 50 фоиз чегирма билан белгиланган эди.
Экспресс тест олиш тартиби жорий қилиниши ортидан чегараларда узундан-узун навбатлар юзага келди ва бу одамларнинг норозилигига сабаб бўла бошлади. Ижтимоий тармоқларда тарқалган Тошкент аэропортидан олинган видеолавҳалардан бирида турнақатор навбатлар ҳамда йўловчилар ва аэропорт ходимлари ўзаро бахслашаётгани акс этган. Ташриф буюрувчилар тестларни олиш ва тўловларни қабул қилиш учун етарлича жой мавжуд эмаслигидан шикоят қилиб, одамларнинг тўпланиши касаллик янада тезроқ тарқалишидан ҳавотирда эканлигини билдирган.
Жумладан, Davletovuz каналида аэропортдан олинган видео эълон қилиниб, у «омикронни юқтиришга турилган навбат», дея изоҳланди.
16 январь куни кечки пайт Соғлиқни сақлаш вазирлиги Санитария-эпидемиологик осойишталик ва жамоат саломатлиги хизмати бу каби танқидларга ўз расмий муносабатини эълон қилди.
Баёнотда айтилишича, Ўзбекистонда сўнгги кунларда кунлик касалланиш ҳолатлари 8 баробарга ошгани туфайли, хавфнинг олдини олиш мақсадида халқаро аэропортлар, темир йўл вокзаллари ва автомобил ўтказиш чегара пунктларида коронавирус инфекциясига экспресс-антиген тест топширишлари белгиланган.
Хизматнинг қайд этишича, 15 январь куни Тошкент шаҳрига учиб келган 3801 нафар фуқаролардан ҳам тест синамалари олинган. Уларнинг барчасида манфий ПЗР тести бўлганлигига қарамасдан 67 нафарида мусбат натижа аниқланган. Ўзбекистондаги барча чегара пунктлари орқали шу куни 15 041 нафар фуқаро ўтган. Улардан 151 нафарида (1 фоизида) коронавирусга мусбат натижа қайд этилган.
Шунингдек, СЭС экспресс тест нархи 5 АҚШ доллари эквивалентида белгилангани масаласига тўхталар экан, «бу дунё кўрсаткичларига нисбатан энг арзон нархлардандир», дея изоҳ берган эди.
Сўнгги кунларда Ўзбекистонда коронавирус инфекциясига чалиниш кўрсаткичи рекорд даражани ташкил этмоқда. Хусусан, 21 январь куни — 1390 кишида, 22 январь куни — қарийб 1,5 минг кишида вирус аниқланган эди. Якшанба куни ушбу кўрсаткич — 1296 гача тушди.
