15 январдан бошлаб Ўзбекистонга барча кириб келганлар нафақат 48 соатдан ортиқ бўлмаган салбий ПЗР тестидан ўтганлиги ҳақидаги сертификатга эга бўлишлари, балки COVID-19 учун экспресс тест ҳам топширишлари талаб этилмоқда. Бундай қарор коронавирусга қарши кураш бўйича Республика махсус комиссияси томонидан мамлакатда касалланишнинг ошиши ва омикрон штаммининг тасдиқланиши фонида қабул қилинди. Экспресс тест нархи эса — $5 этиб белгиланган.
Ижтимоий тармоқларда Тошкент аэропортидан олинган видеолавҳалар тарқалди, унда турнақатор навбатлар ҳамда йўловчилар ва аэропорт ходимлари ўзаро бахслашаётгани акс этган. Ташриф буюрувчилар тестларни олиш ва тўловларни қабул қилиш учун етарлича жой мавжуд эмаслигидан шикоят қилиб, одамларнинг тўпланиши касаллик янада тезроқ тарқалишидан ҳавотирда эканлигини билдирган. Блогер Davletovuz аэропортдан олинган видео билан ўртоқлашар экан, уни «омикронни юқтиришга турилган навбат», дея изоҳлади.
16 январь куни кечки пайт Соғлиқни сақлаш вазирлиги Санитария-эпидемиологик осойишталик ва жамоат саломатлиги хизматининг Ўзбекистонга кириб келаётганларнинг экспресс тести қанчалик муҳимлигини тушунтирган изоҳини эълон қилди.
Баёнотда Ўзбекистонда охирги 10 кун давомида кунлик касалланиш ҳолатлари 8 баробарга ошгани маълум қилинган. Хавфнинг олдини олиш мақсадида халқаро аэропортлар, темир йўл вокзаллари ва автомобил ўтказиш чегара пунктларида коронавирус инфекциясига экспресс-антиген тест топширишлари белгиланди.
Хизматнинг қайд этишича, 15 январь куни Тошкент шаҳрига учиб келган 3801 нафар фуқаролардан ҳам тест синамалари олинган. Уларнинг барчасида манфий ПЗР тести бўлганлигига қарамасдан 67 нафарида мусбат натижа аниқланган. Ўзбекистондаги барча чегара пунктлари орқали шу куни 15 041 нафар фуқаро ўтган. Улардан 151 нафарида коронавирусда мусбат натижа қайд этилган. Бу ташриф буюрувчиларнинг 1 фоизини ташкил этади.
Қўлида касалликдан фориғлиги ҳақида маълумоти бўлганларнинг «нега яна қайта экспресс тест топширишим керак?», дея бераётган саволига СЭС шундай жавоб берди: «Лекин кўриб турганингиздек, ПЗР тест топширган инсонларда ҳам вирус аниқланмоқда. Бу эса, касаллик янада „айёрлашиб“, яширин кўринишга кириб бораётганидан далолат».
«Бундай ҳолатда юртимизга кириб келувчи ҳар бир фуқарони коронавирусга эксперсс-антиген тест топширтириб қабул қилиш энг тўғри йўлдир», — дейилади хабарда.
Касаллик аниқланган фуқаролар ҳолатига қараб уй шароитида ёки шифохонада даволанишга жўнатилмоқда. Уй шароитида даволаниши керак бўлганларга аэропортнинг ўзида бепул 4 хилдаги дори-дармон берилмоқда.
СЭС изоҳига кўра, экспресс тест нархи 5 АҚШ доллари эквивалентида белгиланган, «бу дунё кўрсаткичларига нисбатан энг арзон нархлардандир».
Тест топшириш жараёнида талабалик гувоҳномасини тақдим этган талабаларга 50 фоиз чегирма берилгани ҳам эслатиб ўтилган. | ва || гуруҳ ногиронлиги бор шахслар учун тестлар бепул. 2 ёшгача бўлган болалардан эса тест олинмайди.
«Вақтинча жорий этилган бу тартиб коронавирус инфекциясини юқтирган фуқароларни тезкор аниқлаш, даволаш ва инфекция тарқалишининг олдини олишга хизмат қилади», — дейилади хабарда.
Санитария-эпидемиологик осойишталик хизмати фуқаролардан «мазкур чора-тадбирларни тўғри қабул қилиб, ўз фуқаролик бурчини англаши ва мамлакат ҳудудида коронавирус пандемиясининг янги тўлқини кўтарилмаслиги учун ҳисса қўшишларини» сўраган.
