Қашқадарё вилояти Йўл ҳаракати хавфсизлиги бошқармаси раҳбарияти ЙПХ инспекторларини кўпроқ «протокол» тузишга мажбурламоқда, дея хабар қилди Nasafnews сайти.
Нашр маълумотларига кўра, шахси сир тутилишини сўраган бир гуруҳ инспекторлар Қашқадарё ЙҲХБ раҳбариятининг айрим хатти-ҳаракатлари меҳнат қонунчилигига зид эканини айтган.
«Инспекторларга ярим тунда, навбатчилик қилиш билан бирга уйма-уй юриб, қарздорлик ундириш вазифаси ҳам юкланмоқда. Ҳар биримиз бир кунда 20 та байёнома тузмасак, раҳбарият кеч соат 23:00да „разбор“ қилади. Биз ҳам одам. Бизда ҳам оила бор. Уйимизга, болаларимиз олдига боргимиз келади. Лекин қўйилган юкламаларни бажараман деб уйга ярим тун соат 3 ва 4 га кириб келамиз», — дейди инспекторлардан бири.
Инспекторларнинг сўзларига кўра, топшириқлар асосан вилоят ЙҲХБ бошлиғи ўринбосари Шаҳриддин Қўшоқов томонидан берилади. Nasafnews унинг овози экани тахмин қилинаётган шахс топшириқлари аудиосини эълон қилди.
«Ҳар бир ходим 20 тадан „протокол“ [расмийлаштириши керак]. Қўпол, қўпол эмас — ҳар ҳолат бўйича протокол. 20 тадан кам бўлмасин», — дейилади ёзувда.
Аудионинг бошқа қисмида эркак киши раҳбарият топшириғи бўйича маст ҳолда машина ҳайдаганлик учун ҳар куни биттадан протокол тузиш кераклигини таъкидлайди.
«Ўзингиз биласиз, бизда алкотестер йўқ. Ҳозир пандемия вақти бўлса, бирор бир касал юқтириб олсак нима бўлади? Мана ҳозир тунги соат 22:58 дам олиш куни, ҳали жавоб бўлгани йўқ», — дея қўшимча қилади яна бир инспектор.
Яна бир ходим эса президент томонидан берилаётган 10% баённома пули ҳам тўхтатилиб қўйилгани, хизмат автомашиналарига бензин берилмаётганини маълум қилди.
Ўзбекистон ИИВ ЖХД ЙҲХХ матбуот хизмати мазкур хабар юзасидан хизмат текшируви бошланганини маълум қилди.
Бу биринчи ҳолат эмас
2020 йил ёзида «Газета.uz» пойтахтнинг Олмазор тумани ИИБ ходими Фаррух Холов раҳбариятнинг норозилигига ишора қилиб, профилактика инспекторларини маъмурий баённомалар сони камлиги учун танқид қилгани ҳақида хабар берган эди. Аудиоёзув пайдо бўлганидан сўнг у шу йўл билан инспекторлардан ҳуқуқбузарликларнинг олдини олишда самарали бўлишини талаб қилганини айтди.
Ўтган йилнинг 9 ноябрь куни собиқ профилактика инспектори Нозимжон Нишонов Фарғона вилояти Қува тумани ИИБ бошлиғи ўринбосари устидан шикоят қилиб, ички ишлар вазирига видеомурожаат йўллади. ИИБ бошлиғи ўринбосари профилактика инспекторларини қурилиш материалларини олиб беришга мажбурлагани, улардан ҳар куни 55 минг сўмлик «ўрта фонд» ундираётгани, биттадан машинани жарима майдонига жойлаштириш, бештадан машина учун жарима далолатномаси тузишни мажбурий режа қилиб бергани қайд этилди. Мурожаатда бошлиқ ўринбосарининг бошқа «ноқонуний хатти-ҳаракатлари» ҳақида ҳам сўз юритилиб, уларга «юқори тузилмаларда ҳеч қандай жавоб берилмагани» қайд этилди.
12ноябрь куни Наманган шаҳар ИИО ФМБ 2-сонли профилактика инспектори Сардорбек Отабоев ҳам ИИВ раҳбарига мурожаат қилиб, ИИБ бошлиғи инспекторларни ҳар куни бештадан маъмурий баённома тузиш, бир йилда 2 та маъмурий назорат ўрнатиш каби талабларни режа қилиб белгилаб берганини маълум қилди. Режани бажармаган ходимлар «ишдан бўшатиш билан таҳдид қилинган ёки режа бажарилганини белгилаб қўйиши учун Ҳуқуқбузарликлар профилактикаси бошқармаси бошлиғи подполковник Иномов Бобурга 50 доллар бериш таклиф қилинган»,
Декабрь ойида Тошкент вилоятининг Янгийўл туманида профилактика инспекторлари фуқароларга нисбатан «майда безорилик» ва «жамоат жойларида спиртли ичимликлар истеъмол қилганлик» учун баённомалар тузиш режаси устидан шикоят қилди. ИИБ бошлиғи Олим Собиров режанинг мажбурий эканлигини инкор этди, лекин ходимларга ишлаш бўйича кўрсатмалар берилганини, «кабинетларида ухламасликлари»ни тан олди.
