Тошкент ҳокимлигига Қурилиш вазирлиги билан биргаликда 2022 йил охиригача пойтахт бош режасини ишлаб чиқиш ва тасдиқлаш учун киритиш вазифаси топширилди. Мазкур топшириқ Вазирлар Маҳкамасининг 19 ноябрдаги «2021−2024 йилларда Тошкент вилоятидан Тошкент шаҳрига кўчирилаётган аҳоли пунктларини комплекс ривожлантириш ва аҳолига маиший хизмат кўрсатиш соҳасини янада такомиллаштириш чора-тадбирлари тўғрисида»ги қарорида акс этди.
Ҳужжатга мувофиқ, худди шу муддатда ҳокимлик Тошкент вилоятидан Тошкент шаҳрига ўтказилган ҳудудлар учун батафсил режалаштириш лойиҳаларини ишлаб чиқиши лозим.
Пойтахт ва вилоят чегараларини ўзгартириш август ойида Сенат томонидан маъқулланган эди. Киритилган ўзгартиришлар натижасида Тошкент вилоятининг 7853,3 гектар ер майдони Тошкент шаҳрига, пойтахтнинг 171,3 гектар ери Тошкент вилоятига ўтказилмоқда.
Шунингдек, қарорда ҳокимлик зиммасига манфаатдор вазирликлар, идоралар ва лойиҳа институтлари билан биргаликда ичимлик суви, табиий газ, электр энергияси ва автомобиль йўлларини қуриш ва таъмирлаш лойиҳаларини 2021−2024 йилларда аниқланган талаблар ҳамда бош режа асосида амалга ошириш кетма-кетлигини белгилаб олиб, лойиҳа-смета ҳужжатларини ишлаб чиқиш вазифаси юклатилди.
Бундан ташқари, шаҳар ҳокимлиги ва Қурилиш вазирлигига давлат мактабгача таълим муассасалари, мактаблар, соғлиқни сақлаш, маданият ва спорт муассасаларини қуриш учун аҳолига қулай бўлган жойлардан текин ер участкалари ёки бинолар ажратиб бериш бўйича тегишли топшириқлар бериб ўтилган.
Бош режани тайёрлаш муддати бир неча бор қолдирилган эди
2012 йил ёзида Тошкент шаҳри ва унинг атрофи бош режасининг 2030 йилгача ҳисобланган техник-иқтисодий асослари муҳокама қилингани ҳақида хабар берилган эди.
2018 йилнинг августидаги президент фармонида пойтахтнинг тасдиқланган бош режаси мавжуд эмаслиги «тартибсиз қурилишларга олиб келмоқда, тадбиркорлик субъектлари фаолиятини янада кенгайтиришга имкон бермаяпти, шунингдек, пойтахтни фаол ижтимоий-иқтисодий ривожлантиришга тўсқинлик қилмоқда», дея қайд этилган эди.
Шаҳар ҳокимига 2018 йил 1 октябрга қадар бош режа концепциясининг лойиҳаси ҳамда бош режанинг ўзини ишлаб чиқиш бўйича халқаро танлов ўтказиш топширилди.
2019 йилнинг февраль ойида пойтахт ҳокимининг архитектура, капитал қурилиш ва коммуникацияларни ривожлантириш масалалари бўйича собиқ биринчи ўринбосари Даврон Ҳидоятов (ҳозирги Чирчиқ шаҳар ҳокими) Тошкент шаҳрининг бош режаси концепцияси ўша йилнинг апрелига қадар 3D форматда тайёрланиши ҳақида маълум қилганди. Шунингдек, у лойиҳани яратиш устида Хитой, Туркия ва Буюк Британия компаниялари иш олиб бораётганини қайд этди.
Кейинчалик белгиланган муддатлар ортга сурилди — ишлаб чиқишда турк компанияси иштирок этган ҳужжат 2020 йилда тақдим этилиши режалаштирилаётгани маълум қилинди.
Қурилиш вазирининг собиқ биринчи ўринбосари Шерзод Ҳидоятов (ҳозирги уй-жой коммунал хўжалиги вазири) 2020 йил декабрь ойида Тошкентнинг бош режасини ишлаб чиқиш 2022 йил охиригача якунланиб, аҳолига тақдим этилиши режалаштирилганини маълум қилди. Ушбу муддат ҳукумат томонидан тасдиқланган муддатга мос келади.
Президентнинг 2020 йил ноябрдаги қарори билан 2025 йилгача Ўзбекистоннинг барча шаҳарлари ва шаҳар посёлкаларининг тўртдан бир қисмини бош режалар билан қамраб олиш белгиланган. Бунда лойиҳа ҳужжатлари жамоатчилик муҳокамаси натижаларини ҳисобга олган ҳолда тасдиқланиши лозим.
