Польшалик журналист Агнешка Пикулиcка унинг Ўзбекистонга кириши тақиқлангани ва бир кундан ортиқ вақтдан бери у Ўзбекистон ва Қозоғистон чегарасида эканлиги ҳақида хабар берди. Бу ҳақда у Twitter`да ёзган.
Журналистнинг Eurasianet нашрига хабар беришича, у ҳар ой Ўзбекистондан чиқиб кетиш талабини бажариш учун Қозоғистонга борган, чунки у мамлакатда 30 кунгина визасиз қолиши мумкин. У чегарани кесиб ўтган, сўнг дарҳол машинада қайтиб кирмоқчи бўлган. Бироқ чегарачилар уни киритишга рухсат беришмаган. Унинг сўзларига кўра, у аввал ҳам худди шундай ишни амалга оширган.
Агнешка Пикулицканинг ёзишича, у «совуқда икки чегара ўртасида қолиб кетган», чунки у коронавирус билан боғлиқ чекловлар туфайли Қозоғистонга бора олмайди.
Ўзбекистон Ташқи ишлар вазирлиги «меҳрибонлик кўрсатиб» уни Тошкент аэропортига олиб бориши ва Туркияга чипта сотиб олиб, уйига нарсаларни олиб кетишлари мумкинлигини маълум қилган. Аммо у рад этган, чунки тайёрланишига атиги 10 дақиқа қолган бўлган.
«Ўзгаришлар бўлиши мумкин деган умидда Ўзбекистонга келганимга 3 йилдан ошди. Ҳозирги ҳукумат даврида ҳеч қандай тизимли ўзгаришлар бўлмайди, деган ишонч билан кетяпман», — деб ёзади у.
Журналистнинг қайд этишича, Польша элчихонасига Ўзбекистон нима сабабдан унинг мамлакатга киришини рад этишга қарор қилгани ҳақида ҳозирча ҳеч қандай маълумот келиб тушмаган.
«Таклифни рад этганимдан бери мен ҳамон чегарадаман, совуқда, на овқат, на ухлаш учун оддий жой бор. Мен ҳеч қандай жиноят қилмадим, шунчаки ўз ишимни қилдим», — дея қайд этди Агнешка Пикулицка.
У аввалроқ дуч келган босим ва обрўсизлантиришга уринишларни эслатди. Шу билан бирга, у барча чегарачиларга «меҳрибонлик ва тушуниш» учун миннатдорчилик билдирди.
«Мен совуқ қотдим ва чарчадим, лекин музлаб қолишимга имкон беришмаяпти. Мен чегарани иложи борича тезроқ тарк этишни, шу билан бирга ўз мулкимга ҳам эгалик қилишни истайман. Мен жиноятчи эмасман, журналистман. БУ ЖИНОЯТ ЭМАС», — деди у.
«Газета.uz» Ўзбекистон ТИВга сўров юборди.
Агнешка Пикулицка февраль ойи бошида Al Jazeera телеканалининг Ўзбекистондаги мухбири сифатида аккредитация қилинган эди. Бунгача журналист ТИВ ходимининг таъқиби ва аккредитациядан ўтишга уринаётгани ҳақида гапирган эди. Кейинроқ Ташқи ишлар вазирлиги ундан узр сўраган.
Апрель ойида Ўзбекистон ИИВ журналистни калтакланган блогер Миразиз Базаров атрофидаги вазиятни холис ёритишда ва ҳуқуқ-тартибот идораларини обрўсизлантиришда айблаган эди.Агнешка Пикулицка буни журналист сифатида обрўсизлантиришга уриниш деб атади ва агар у ҳақиқатдан ҳам ОАВ ҳақидаги қонунчиликни бузган бўлса, судга беришга тайёрлигини маълум қилган.
Июнь ойида ТИВ польшалик журналист Агнешка Пикулицка томонидан «Ўзбекистон Республикаси қонунчилигининг бузилиши ҳолатлари қайд этилганлиги» сабабли унинг аккредитациясини узайтирмасликкақарор қилган.
