Фарғона вилояти ҳокими Хайрулло Бозоров Фарғона шаҳрида электромобиллар ишлаб чиқариш лойиҳасини амалга ошираётган «Central Asia Motors» корхонасида бўлиб, корхонани ишга тушириш билан боғлиқ жараёнлар билан танишди. Бу ҳақда вилоят ҳокимлиги ахборот хизмати хабар берди.

Маълум қилинишича, Фарғона механика заводи ҳудудида жойлашган ушбу корхонада умумий қиймати 50 млн доллар бўлган «Электромобиллар учун эҳтиёт қисмларни ишлаб чиқаришни ўзлаштириш ҳамда енгил ва юк электромобиллар ишлаб чиқариш» лойиҳаси йўлга қўйилмоқда.

Қайд этилишича, ушбу маблағнинг 5 млн доллари тадбиркорнинг ўз маблағлари, яна 5 млн доллари банк кредити, қолган 40 млн доллари тўғридан-тўғри хорижий инвестиция ҳисобланади. Лойиҳа ҳужжатларида хорижий инвестор сифатида Хитойнинг «Great Wall Ceramic Industries» компанияси кўрсатилган.

Сентябрь ойи охирида берилган маълумотларда лойиҳа Хитойнинг Hong Kong ZRSC компанияси билан ҳамкорликда амалга оширилиши айтилганди.

Фото: Фарғона вилояти ҳокимлиги матбуот хизмати

Қўшимча қилинишича, босқичма-босқич амалга ошириладиган ва 2022 йилда якунланадиган лойиҳа натижасида 350 тадан ортиқ янги иш ўрни яратилади. Тўла қуввати билан ишга тушгач, корхонада йилигм 10 минг электромобиль ишлаб чиқарилиши мумкин.

Ишлаб чиқарилган маҳсулотнинг 40 фоизи экспорт қилинади.

Фото: Фарғона вилояти ҳокимлиги матбуот хизмати

Маълумотга кўра, декабрь ойида 4 та енгил ва 8 та юк электромобиллари тест режимида янги корхона конвейерларидан чиқади. Дастлабки босқичда гибрид қувватли (ток ва бензин) электромобиллар ишлаб чиқарилиб, бунда электр қуввати 20 фоиздан камайганда бензин двигатели ишга тушади ҳамда бензин билан ишлаш жараёнида электромобиль батареяси қувват олади.

«Ҳозирда электромобилларни йиғиш ва тест ускуналаридан ўтказиш цехи ҳамда электрофорез ва бўяш цехи ишлаб чиқариш жараёнларига тайёр бўлиб, электромобилларнинг кузов қисмини пайвандлаш учун цех ташкил этишга қўшимча ишлаб чиқариш майдонига эҳтиёж борлиги масаласи вилоят ҳокимига билдирилди», — дейилади хабарда.

Фото: Фарғона вилояти ҳокимлиги матбуот хизмати

Вилоят раҳбари, механика заводи ҳудудидаги бўш турган майдонлардан ушбу инвестицион лойиҳани якунлаш учун белгиланган тартибда жой ажратиб бериш бўйича тегишли масъулларга топшириқ берди.

Ўзбекистонда электромобиль ишлаб чиқаришни йўлга қўйиш бўйича аввал ҳам бир-нечта лойиҳалар тақдим қилинган эди. Жумладан, июнь ойида Андижондаги Асака заводида электромобиллар ишлаб чиқариш йўлга қўйилиши маълум қилинган эди.

Апрель ойида «Газета.uz» Фарғонада йил охиригача электромобилларни йиғиш йўлга қўйилиши кутилаётгани ҳақида ёзган эди. 520 млрд сўмлик қийматга эга инвестицион лойиҳа президент иштирокидаги йиғилишда тақдим этилганди. Мазкур лойиҳанинг умумий қиймати 520 млрд сўм бўлиб, объектнинг ишга туширилиш вақти 2021 йилнинг ноябрь ойига белгиланганлиги айтилган эди.

Март ойида Молия вазирлиги мамлакат ичида электромобил харид қилиш ва уларни вақтинча олиб кириш учун тўловларни бекор қилиш бўйича таклиф киритган эди. 2020 йилда Ўзбекистон 2,9 млн доллар қийматга эга 131 та электромобиль импорт қилган.

«Ўзавтосаноат» компанияси Ўзбекистонда электромобиллар ишлаб чиқарилиши 2025 йилда бошланиши ҳақида маълум қилган эди.

2019 йилнинг сентябрь ойида президентнинг Фарғона вилоятидаги «Қўқон» эркин иқтисодиёт зонасига ташрифи чоғида «Шаффоф омадли саноат» хусусий корхонаси хитойнинг Silk Road Company компанияси билан биргаликда 2021 йилдан электромобилларни ишлаб чиқаришни бошлаши ҳақида айтилган эди. Электромобилнинг нархи 3000 долларга баҳоланган эди. Лекин ўшандан бери лойиҳа ҳақида маълумот берилмади.