2022−2024 йилларга мўлжалланган инвестиция дастурини амалга ошириш чора-тадбирлари тўғрисидаги президент қарори лойиҳасига мувофиқ, Фарғонада электромобиль ишлаб чиқаришни йўлга қўйиш режалаштирилмоқда. Лойиҳа Central Asia Motors корхонаси негизида Хитойнинг Hong Kong ZRSC компанияси билан ҳамкорликда амалга оширилиши кўзда тутилган.
Лойиҳанинг умумий қиймати 55 млн долларга баҳоланган бўлиб, шундан 43 миллион долларини тўғридан-тўғри хорижий инвестициялар ташкил этади.
Йилига 10 мингта электромобиль ишлаб чиқариш қувватига эга бўлган мазкур лойиҳа доирасида 100 та янги иш ўрни яратилиши режалаштирилган. Ишлаб чиқариш 2022 йил декабрда бошланиши кутилмоқда.
Ўзбекистонда электромобиль ишлаб чиқаришни йўлга қўйиш бўйича аввал ҳам бир-нечта лойиҳалар тақдим қилинган эди. Жумладан, июнь ойида Андижондаги Асака заводида электромобиллар ишлаб чиқариш йўлга қўйилиши маълум қилинган эди.
Апрель ойида «Фарғона» кичик саноат зонасида йил охиригача электромобилларни йиғиш йўлга қўйилиши режалаштирилганлиги хусусида хабар қилинган эди. Мазкур лойиҳанинг умумий қиймати 520 млрд сўм бўлиб, объектнинг ишга туширилиш вақти 2021 йилнинг ноябрь ойига белгиланганлиги айтилган эди.
2019 йилнинг сентябрь ойида президентнинг Фарғона вилоятидаги «Қўқон» эркин иқтисодиёт зонасига ташрифи чоғида «Шаффоф омадли саноат» хусусий корхонаси хитойнинг Silk Road Company компанияси билан биргаликда 2021 йилдан электромобилларни ишлаб чиқаришни бошлаши ҳақида айтилган эди. Электромобилнинг нархи 3000 долларга баҳоланган эди. Лекин ўшандан бери лойиҳа ҳақида маълумот берилмади.
«Ўзавтосаноат» компанияси Ўзбекистонда электромобиллар ишлаб чиқарилиши 2025 йилда бошланиши ҳақида маълум қилган эди.
Март ойида Молия вазирлиги мамлакат ичида электромобиль харид қилиш ва уларни вақтинча олиб кириш учун тўловларни бекор қилиш бўйича таклиф киритди.
Статистика қўмитаси маълумотларига кўра, жорий йилнинг саккиз ойида электромобиль импорти ўтган йилнинг мос даврига нисбатан етти бараварга ошиб, қиймати 9,2 млн долларга тенг бўлган 501 та электромобиль импорт қилинган. 2020 йилда Ўзбекистон 2,9 млн доллар қийматга эга 131 та электромобиль импорт қилган эди.
