Шавкат Мирзиёев Асакадаги заводда электромобиллар ишлаб чиқариш йўлга қўйилишини маълум қилди, дея хабар бермоқда «Газета.uz» мухбири.
«Яқинда (27 май куни) вилоятда 105 гектар ерда „Машинасозлик ва электротехника саноат хаби“ махсус зонасини ташкил этиш тўғрисидаги қарорни имзоладим. Ўзавтосаноат томонидан ушбу Саноат хабида 2021−2023 йилларда 80 млн доллар инвестиция эвазига, 8 та лойиҳани амалга ошириш режалаштирилган», — деди у.
Жумладан, чўян деталларни қуйиш, уларга механик ишлов бериш, резина жипсловчи деталлар, автомобиль ойна тозалагичлари, шасси учун пружиналар ишлаб чиқариш ўзлаштирилади.
Президент электромобиллар ишлаб чиқариш бўйича топшириқ берганини таъкидлаб ўтди.
«Бу лойиҳалар етарли эмаслигини ҳисобга олиб, Сардор Умурзоқов (бош вазир ўринбосари), „Ўзавтосаноат“, „Элтехсаноат“ бир ой муддатда Саноат хаби ҳудудида янги лойиҳаларни амалга ошириш бўйича таклифларни ишлаб чиқиб, тақдимот қилсин. Шу жумладан, вилоятда металлургия заводи қурилиши лойиҳасини ҳам тайёрлаш лозим», — деди давлат раҳбари.
Эслатиб ўтамиз, 2020 йилнинг декабрь ойида «Ўзавтосаноат» компаниясини фақат электромобиллар ишлаб чиқаришга ўтказишни режалаштираётгани ҳақида хабар берилган эди. Бу ҳақда Вазирлар Маҳкамасининг 29 декабрдаги қарорида (ВМҚ-812) сўз боради.
Ҳужжат «Ўзавтосаноат»ни фақат электр двигателлари бўлган автомобиллар ва автотранспорт воситаларини ишлаб чиқаришга ўтказишни назарда тутган. 2021 йил 1 февралгача компанияга хорижий мутахассислар ва консалтинг компанияларини жалб қилиш ҳамда концепсия лойиҳасини ишлаб чиқиш топширилган эди.
