Jurabek Laboratories МЧЖ қўшма корхонасида ишлаб чиқарилаётган «Спутник V» вакцинаси 1- ва 2- компонентларининг дастлабки 260 минг 500 дозаси Санитария-эпидемиологик осойишталик ва жамоат саломатлиги хизматига топширилди. Бу ҳақда ССВ ахборот хизмати хабар берди.
Jurabek Laboratories ахборот хизматининг «Газета.uz»га маълум қилишича, бу «Спутник V» вакцинасининг биринчи партияси ҳисобланади. Вакцина фақат маҳаллий бозорга сотилиши айтилди. Вакциналарнинг нархлари бўйича маълумот берилмади.
Қўшимча қилинишича, яна бир партия ишлаб чиқарилган ва ҳозирда таҳлил жавоблари кутилмоқда.
Бу Ўзбекистонда тайёрланаётган иккинчи вакцина ҳисобланади. Бундан аввал ушбу корхонада жами 7 млн доза ZF-UZ-VAC2001 вакцинаси ишлаб чиқарилган бўлиб, унинг 1,4 млн дозаси эмлаш учун топширилиган эди.
Шундай қилиб, мамлакатда эмлаш жараёнларида фойдаланилаётган жами вакцина 28 млн 473 минг 528 дозани ташкил қилмоқда.
Улардан 1 млн 594 минг 480 дозаси AstraZeneca, 21 млн 958 минг 488 дозаси ZF-UZ-VAC2001, 720 500 дозаси «Спутник V», 3 млн 060 дозаси Moderna, 1 млн 200 минг дозаси Pfizer/BioNTech вакцинасидир.
Шундан 22 млн 721 минг 129 дозаси эмлаш жараёнларида қўлланилган бўлиб, 5 млн 226 минг 139 нафар аҳоли коронавирусга қарши барча босқичларда тўлиқ эмланган.
Август ойида Ўзбекистон ҳукумати Jurabek Laboratories компаниясида ишлаб чиқарилган ZF-UZ-VAC 2001 ва «Спутник V» вакциналарини давлат рўйхатидан ўтказишга розилик бергани ҳақида ҳам хабар берилган.
Эслатиб ўтамиз, 1 ноябрга қадар аҳолининг 70 фоизини эмлаш режалаштирилган.
