Бугун, 30 сентябрь куни Jurabek Laboratories МЧЖ қўшма корхонаси томонидан ишлаб чиқарилган хитой-ўзбек вакцинасининг 1 млн 458 минг 820 дозаси Ўзбекистон Санитария-эпидемиологик осойишталик ва жамоат саломатлиги хизмати вакилларига топширилди. Бу ҳақда Инновацион ривожланиш вазирлигига қарашли «Vaksinauz» Telegram-канали хабар берди.
Маълум қилинишича, ҳозирги кунда корхона томонидан жами 7 млн доза вакцина ишлаб чиқарилган. Уларнинг кейинги дозалари босқичма-босқич эмлаш пунктларига етказиб берилади.
Фото: «Vaksinauz» Telegram-канали
Қайд этилишича, Jurabek Laboratories томонидан мазкур вакцинани ишлаб чиқариш Хитойнинг Anhui Zhifei Longcom Biopharmaceutical Co., Ltd. компанияси билан имзоланган ҳамкорлик шартномаси доирасида амалга оширилмоқда.
«Мазкур ишлаб чиқаришнинг ташкил этилиши Ўзбекистон ва Хитой олимлари, вирусологларининг ҳамкорлиги натижасидир», — дея қўшимча қилинади хабарда.
Ушбу вакцина Хитой Фанлар академияси Микробиология институти ҳамда Ўзбекистон Инновацион ривожланиш вазирлиги ҳузуридаги Илғор технологиялар маркази ва ССВ Вирусология илмий-тадқиқот институти билан ҳамкорликда Zhifei Longcom Biopharmaceutical компанияси томонидан яратилган. Мазкур вакцина 3-фаза клиник синовлари натижаларига кўра 3-дозадан сўнг вакцинанинг самарадорлиги барча штаммлар учун умумий 81,76%, «британча» штаммга қарши эса 92,93% ташкил этган.
Июль ойида «Газета.uz» Ўзбекистонда август ойидан бошлаб коронавирусга қарши хитой-ўзбек вакцинаси ишлаб чиқариш бўйича меморандум имзоланишига келишилгани ҳақида ёзган эди. Биринчи босқичда ойига 10 млн доза вакцина ишлаб чиқариш ва кейинчалик бу кўрсаткични йилига 200 млн дозагача олиб чиқиш кўзда тутилаётгани айтилган.
Август ойида Ўзбекистон ҳукумати Jurabek Laboratories компаниясида ишлаб чиқарилган ZF-UZ-VAC 2001 ва «Спутник V» вакциналарини давлат рўйхатидан ўтказишга розилик бергани ҳақида ҳам хабар берилган.
Эслатиб ўтамиз, 1 ноябрга қадар аҳолининг 70 фоизини эмлаш режалаштирилган.
Маълумот учун, 29 сентябрь ҳолатига кўра, Ўзбекистонда жами 20,5 млн дозадан ортиқ вакцина қўлланилган. Шу кунгача тўлиқ эмланган фуқаролар 4 млн 458 минг 166 нафарни ташкил қилмоқда.
