Агар биринчи доза вакцинани олиб, иккинчиси билан эмланмаган ёки иккита босқичда эмланиб, 3 доза вакцина олинмаган бўлса 12 ҳафта муддат ичида кейинги доза босқичларини давом эттириш мумкин. Бу ҳақда Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов маълум қилди.
Унинг сўзларига кўра, эмланишлар орасидаги муддат 12 ҳафтадан кўп бўлса, яъни 3 ойдан ортиқ бўлса эмланиш қайтадан — биринчи дозадан бошланади.
«Вакцинанинг қайси тури бўлишидан қатъий назар, AstraZeneca, Спутник V ёки ZF-UZ-VAC2001 вакцинаси бўладими, оралиқ муддат 12 ҳафтадан ошса, ревакцинация қилинади», — дея таъкидлади Ботир Қурбонов.
Вирусология институти директори Эркин Мусабоев «Газета.uz»га берган интервьюсида ўзбек-хитой вакцинаси, шунингдек AstraZeneca ва «Спутник V» билан эмлангандан кейин қанча вақт ўтгач қайта эмланиш кераклиги масаласи кўриб чиқилаётгани ва бу борада ҳали аниқ кўрсатмалар мавжуд эмаслиги ҳақида айтган эди.
