Ташқи меҳнат миграцияси агентлигининг Андижон филиали Россияга ишга жўнатган 41 нафар ўзбекистонликлар ваъда қилинган маош тўланмаётганлиги ва етарли шароитлар яратилмаганлиги устидан шикоят қилиб чиққан эди. Олий Мажлис Сенати ушбу ҳолатни ўз назоратига олгани ҳақида хабар берилган.
Мазкур ҳолат юзасидан Ташқи меҳнат миграцияси агентлиги қўшича маълумот берди.
Агентлик баёнотига кўра,Ташқи меҳнат миграцияси агентлиги ва Россиянинг «Южный» агрокомбинати ўртасида қишлоқ хўжалигида ишлаш учун 400 нафар фуқарони танлов асосида ушбу корхонага жалб қилиш бўйича келишув қилинган. Келишувга кўра, ишчилар учун 33 минг рублдан 50 минг рублгача ойлик маоши кўзда тутилган бўлиб, фуқароларнинг йўлкира, ҳужжатларни расмийлаштириш харажатлари кейинчалик уларнинг иш ҳақидан ушлаб қолиш шарти билан корхона ҳисобидан тўлаб берилиши, агар бир йил давомида ишласа, корхона томонидан қопланиши белгиланган.
Агентликнинг Андижон филиали томонидан ушбу корхона вакили иштирокида 16 июнь куни ўтказилган танловда танлаб олинган 143 нафар фуқаро бирин-кетин 23−22−29 июнь ҳамда 4−5 июль кунлари Черкесск шаҳридаги «Южный» агрокомбинатида ишлаш учун жўнаб кетган.
Қайд этилишича, фуқароларнинг яшаш ва меҳнат шароитлари ҳамда паспортларининг олиб қўйилгани юзасидан қилган мурожаатига асосан 14−16 июль кунлари Ташқи меҳнат миграцияси агентлиги ишчи гуруҳининг ушбу корхонага хизмат сафари ташкил этилган.
Ишчи гуруҳи томонидан ўрганишлар ва иш берувчилар билан олиб борилган музокаралар натижасида фуқароларнинг яшаш ва меҳнат шароитларини яхшилаш, ойлик маошларини ўз вақтида бериш ҳамда ҳужжатларни расмийлаштириш жараёнларини тезлаштириш бўйича келишув далолатномаси расмийлаштирилганлиги айтилмоқда.
Шунингдек, видеомурожаатда айтилган бир кунлик маош (130−120 сўм — таҳр.), аслида, бир соатлик экани маълум бўлди.
