Ижтимоий тармоқларда «Бизни қул қилиб сотиб юборганмисизлар?» сарлавҳа остида эълон қилинган видеомурожаат бўйича Олий Мажлис Сенати муносабат билдирди.
Видео лавҳада 41 нафар Ўзбекистон фуқароси хорижга ишлашга жўнатилгани, лекин уларга ваъда қилинган иш ҳақи тўланмаётганлиги ҳақида шикоят қилинади.
«Улуғбек ака, (видеода мурожаат қилинган шахсга қарата айтиляпти — таҳр.), 41 нафар одам келганмиз Ўзбекистондан. Бугундан ишга чиқдик. Мен 130 сўм пул топдим. Қолган болалар 120 сўмдан ишлади. Эрталабдан кечгача ишлаган пулимиз бу. Бизга 33 мингдан 50 минггача [рубль] ойлик ваъда қилинган. Ётоғимизни пулга сотяпти. Ҳозир қарзимиз ҳам бор. Бизни сотиб юборганмисизлар, тушунмаяпмиз. Хоҳлаган пулини бериб, ишлатишяпти», — дейилади мурожаатда.
Видео лавҳада бошқа инсонлар ҳам иш оғирлигини таъкидлашди. «Ваъда қилинган пулни ким беради бизга? Қул бўлиб келдикми бу ерга? Ҳар биримизнинг бола-чақамиз бор 3 тадан, 5 тадан, уйда нон ейман деб кутаётган. Макарон қайнатиб беряпти индамай чиқяпмиз, ётоғи бор экан, деб. Нима қилиш керак? Ким ҳал қилади бу нарсаларни?», — дея қўшимча қилади видео мурожаат йўллаган киши.
«„500 доллардан йўл кира сарфладик сенларга“, дейишяпти. Энди 6 ой ишлаймизми қарзни узиш учун? Ҳозир ҳисобласак, кунига 200 сўм топганимизда ойига 6000 сўм топар эканмиз. Қайси давлатда ойига 6000 сўм беради? Ҳал қилинглар бу масалани», — дейди у.
Олий Мажлис Сенатининг маълум қилишича, ушбу фуқаролар Ташқи меҳнат миграцияси агентлиги Андижон филиали орқали Россия Федерациясига ишга жўнатилган.
Мазкур видеомурожаат Сенатнинг Ёшлар, маданият ва спорт масалалари қўмитаси томонидан назоратга олинган. Қўмита томонидан Бандлик ва меҳнат муносабатлари вазирлигига ушбу ҳолат юзасидан тушунтириш берилиши бўйича сўров юборилган.
Ҳолат бўйича ўрганиш натижалари маълум қилиниши таъкидланди.
