Aбу Дабида 19 июлдан бошлаб комендантлик соати ва амирликка кириш учун чекловлар жорий қилинади
Aбу Даби Фавқулодда қўмитаси амирликка ташриф буюрувчилар учун қоидаларни янгилади. ПЗР тест-синовининг манфий натижасига эга шахслар 48 соат ичида, БAAда қўлланадиган тезкор тестдан ўтганлар эса 24 соат ичида мамлакатга кира оладилар. Бундан ташқари, ПЗР тестидан ўтганлар тўрт кундан сўнг, экспресс-тестдан ўтганлар эса уч кун ўтгач тестдан қайта ўтишлари керак бўлади. Шунингдек, кўчалар ва жамоат объектларини санитаризация қилиш мақсадида ярим тундан 05:00 гача комендантлик соати жорий этилмоқда. Ушбу соатларда шахсий ва жамоат транспорт воситаларининг ҳаракати тўхтатилади, аҳолининг ҳаракатланиши тақиқланади.
28 июнь куни Aбу Даби ҳукумати 20 августдан бошлаб барча жамоат жойлари, шу жумладан савдо марказлари, ресторанлар, кафелар, дам олиш масканлари, кўнгилочар марказлар, музейлар, истироҳат боғлари ва спорт залларига фақат эмланганлар киришлари мумкинлигини эълон қилган эди. Ушбу чора курорт зоналари, болалар боғчалари, мактаблар ва университетларга ҳам тааллуқли. Эмлашга қарши кўрсатмаларга эга шахслар ва 15 ёшгача бўлган болалар бундан мустасно. — ТАСС.
ЖАРдаги тартибсизликларда вафот этганлар сони 117 нафарга етди
3 мингдан ортиқ киши ҳибсга олинган. Маълумотларга кўра, норозилик намойишлари ва тартибсизликларни бартараф этиш учун 25 минг аскар сафарбар қилинган. The Guardian’нинг ёзишича, давом этаётган норозиликлар бутун мамлакат бўйлаб ёқилғи ва озиқ-овқат таъминотига таҳдид солмоқда. Намойишчилар дўконлар ва савдо омборларини талон-торож қилишмоқда, шунингдек, йўлларни ва бошқа муҳим инфратузилма объектларини тўсиб қўйишмоқда. Кўплаб зарар кўрган ҳудудларда қуролланган фуқаролар ўз-ўзини ҳимоя қилиш гуруҳларини тузишди, улар тўсиқлар ўрнатиб, намойишчиларга қарата ўқ узишмоқда. Ҳокимият фуқаролардан бундай ҳаракатларни тўхтатишни сўрамоқда. — The Guardian
Аввалроқ Жанубий Aфрика Республикасида мамлакат собиқ президенти Жейкоб Зуманинг қамоққа олингани сабабли норозилик намойишлари бошлангани ҳақида ёзган эдик.
Aфғонистон ҳукумат идораларига «Толибон» ҳаракатларидан етказилган зарар 500 млн долларни ташкил этди
Жангарилар мамлакатнинг 116 ҳудудида 260 та давлат муассасалари биноларини, шунингдек, давлат мулкини вайрон қилишди. Қарийб 13 млн афғонистонлик ижтимоий хизматлардан фойдаланиш ҳуқуқидан маҳрум этилди. Ва эндиликда 50 мингга яқин давлат хизматчилари ўз вазифаларини бажара олмайдилар.
Гаити президентига суиқасд уюштиришда гумон қилинаётган шахс ҳокимият тепасига келишни режалаштирган — ОАВ
Гаитида ҳибсга олинган америкалик (асли гаитилик) Кристиан Эмманюэль Санон республика президенти Жовенель Моизни ўлдириш бўйича операциянинг тахминий координатори деб гумон қилинмоқда. Санон мамлакатда ҳокимият тепасига келишни режалаштириб, ушбу режани амалга ошириш жараёнида ўзининг хавфсизлигини таъминлаши учун «шахсий соқчи» гуруҳини тузган. Бу ҳақда The Washington Post ихтиёрида бўлган ҳужжатлар, шунингдек ушбу режалар билан таниш бўлган одамларнинг кўрсатмаларига таяниб хабар бермоқда. Нашрнинг ёзишича, Санон AҚШнинг Флорида штатида бўлган пайтида Гаитини қайта қуриш бўйича кенг кўламли режани ишлаб чиққан. Унингча, бунинг натижасида мамлакатга 83 млрд долларгача бўлган сармоялар киритилар эди, бу эса Гаитини қашшоқликдан олиб чиқиш ва замонавий инфратузилма билан таъминлашга ёрдам берган бўлар эди. Бундай гаплар билан Санон тарафдорларини фаол равишда жалб қилган, дея ёзмоқда нашр.
7 июль куни Гаити президенти Жовенель Моиз ўз уйида отиб ўлдирилган эди.
Шунингдек: Гаити полицияси марҳум президент хавфсизлик хизмати бошлиғини ҳибсга олди.
БМТ бош котиби Токио Олимпиадаси вақтида Олимпия сулҳига риоя қилишга чақирди
БМТ бош котиби Aнтониу Гутерриш барча мамлакатларни Японияда бўлиб ўтадиган Олимпия ўйинлари вақтида Олимпия сулҳига риоя қилишга чақирди. «Олимпия сулҳи — бу ўйинлар пайтида барча қуролларни жим сақлаш учун анъанавий сигнал. Тўқнашувларда қатнашаётган барча томонларни Токио Олимпия ва Паралимпия ўйинлари пайтида Олимпия сулҳига риоя қилишга чақираман», — деди у. Гутерриш, шунингдек, «умумий мақсадлар учун тинчлик ва бирликка интилиш бу йил пандемияни тугатиш учун курашаётганимизда янада муҳимроқ» эканлигини таъкидлади. — ТАСС.
Шунингдек:
- Германияда душанбадан бери давом этаётган ёмғирлар туфайли юзага келган сув тошқини оқибатида 1,3 минг киши бедарак йўқолди. Сув босган йўллар ва вайрон бўлган кўприклар туфайли баъзи аҳоли пунктларига ҳанузгача кириш имкони йўқ. Сўнгги маълумотларга кўра, 80 дан ортиқ киши ҳалок бўлди. Бельгияда эса қурбонлар сони 22 нафарга етди, яна 10 дан ортиқ киши бедарак йўқолган.
- Франция пойтахтининг рамзи бўлган Эйфель минораси меҳмонлар учун қайта очилди. Минора 2020 йил 29 октябрда коронавирус тарқалишига қарши курашиш бўйича чеклов чоралари туфайли ёпилган эди.
- Пандемияга қарши курашиш учун Хитой халқаро ҳамжамиятга 3 млрд доллар миқдорида ёрдам беради.
