Хитой-ўзбек ZF-UZ-VAС2001 вакцинаси тадқиқотларнинг учинчи босқичи натижаларига кўра, юқори даражадаги антитаналар ишлаб чиқилишини кўрсатди. Вакцинани коронавируснинг янги «британия» ва «бразилия» штаммларига қарши самарали эканлиги тасдиқланди, дея хабар бермоқда Vaksina.uz Telegram канали.
Қайд этилишича, февраль ойида ўтказилган синовлар натижаларига кўра, вакцина коронавируснинг «жанубий африка» штаммига ҳам қарши актив нейтрал ҳолатини сақлаб қолди.
Назорат гуруҳига киритилган 150 нафар кўнгиллиларнинг 90 фоизида иккинчи дозадан сўнг қонда 4,55 Au/ml дан юқори бўлган антитаначалар даражаси аниқланди. Бу коронавирусни зарарсизлантириш учун етарли ҳисобланади, дейилади хабарда.
27 март куни Хитой-Ўзбекистон ҳаммуаллифлигидаги ZF-UZ-VAC2001 вакцинаси Хитойдан 1 млн дозада олиб келинган эди. Соғлиқни сақлаш вазири апрель-июнь ойларида ҳам яна 3,5 млн дозада мазкур вакцинани олиб келиниши ҳақида маълум қилган.
1 апрель куни Ўзбекистонда COVID-19га қарши вакцинация жараёни бошланди. Биринчи босқичда 65 ёшдан катта бўлган фуқаролар ҳамда тиббиёт ходимлари эмланди.
Хитой-Ўзбекистон ҳаммуаллифлигидаги ZF-UZ-VAC2001 вакцинасини олганларда иситма, аллергик реакциялар ва укол қилинган жойда қизариш сингари ножўя таъсирлар кузатилиши мумкин. Бироқ бундан қўрқиш керак эмас, 2−3 кунда ўтиб кетади дея маълум қилган эди инновацион ривожланиш вазири ўринбосари.
