16 март куни Ўзбекистон футбол ассоциацияси тартиб-интизом қўмитасининг навбатдаги йиғилиши бўлиб ўтди. Унда сўнгги вақтларда ўзбек футболи оламида кўплаб бахс-мунозараларга сабаб бўлган «Турон» ва «Сўғдиёна» клублари ўйини масаласи кўриб чиқилди.
Ўзбекистон Суперлигаси 2-тури доирасида «Турон» клуби мураббийи Исломбек Исмоилов «Сўғдиёна» клубига қарши баҳсдан кейинги расмий флеш-интервью чоғида сўкинган ҳолда, этика нормаларини бузганлиги учун Тартиб-интизом қўмитаси унга нисбатан 2 та ўйинга четлаштириш интизомий чорасини белгилади.
«Турон» клуби президенти Aбдуваҳоб Aҳмадалиев «Сўғдиёна» клубига қарши баҳсдан кейинги интервьюси давомида ўз фикрларини қўпол тарзда билдиргани учун қўмита унга нисбатан жарима интизомий чорасини белгилади.
Kun.uz нашрининг ёзишича, ўйин бош ҳаками Виктор Серазитдинов ўз айбини тан олган. Буни нашрга ЎФAдаги йиғилишдан кейин «Турон» клуби президенти Aбдуваҳоб Aҳмадалиев маълум қилган. Унинг айтишича, Серазитдинов ҳақиқатан ҳам, иккита вазиятда «Сўғдиёна» фойдасига қарор чиқарганини ўз қўли билан ёзиб берган. «Бизга берилмаган пеналти ва бизни дарвозамиз томон белгиланган пеналти бўйича айбини тан олган», — дейди клуб президенти.
Аввалроқ, 14 март куни бўлиб ўтган «Сўғдиёна» — «Турон» учрашуви бош ҳаками Виктор Серазитдиновнинг учрашувдаги фаолияти қониқарсиз деб баҳоланиб, ҳакамлик фаолиятидан номуайян муддатга четлатилгани ҳақида хабар берган эдик.
Бундан ташқари, қўмита йиғилишида Ўзбекистон Суперлигаси 1-тури доирасидаги «Бунёдкор» — «Машъал» учрашувида «Машъал» футболчиси Муҳаммад Юлдашев учрашувда оёқ кийимининг таг қисми билан рақиб жамоаси футболчининг кўкрак қисмига тепгани масаласи ҳам муҳокамақ қилинди. Бунинг учун у 2 та ўйинга четлаштирилди.
Шунингдек, Ўзбекистон «U21» биринчилиги 1-тури доирасидаги «Навбаҳор лочинлари U21» — «Сўғдиёна U21» учрашувида Навбаҳор футболчиси Исломжон Aбдуллаҳонов ва Сўғдиёна футболчиси Нодирбек Кутубоев ўйин расмийларига хақоратли сўзлар ишлатган эди. Бунинг учун уларга нисбатан 3 та ўйинга четлаштириш интизом чораси кўрилди. Қолаверса, ушбу учрашувда «Сўғдиёна U21» бош мураббийи Расул Хаитов ўзини назорат қила олмай, майдонга тушиб, рақиб жамоаси ва ўз жамоаси шаънига хақоратли сўзлар ишлатгани учун унга нисбатан 2 та ўйинга четлаштириш ҳамда жарима интизом чораси белгиланди.
