Россияда коррупцияга қарши курашиш жамғармаси асосчиси Алексей Навальний «Мен ўз қотилимга қўнғироқ қилдим. У ҳаммасини тан олди» деб номланган видеони интернетга жойлади.
Аввалроқ, CNN, The Insider va Bellincat нашрлари томонидан биргаликда суриштирув олиб борилгани ва суиқасдда 8 нафар ФСБ ходимининг қўли борлиги ҳақида айтилган эди. Жойланган видеода Навальний эълон қилинган Федерал хавфсизлик хизмати (ФСБ) ходимларининг бири — Константином Кудрявцев билан гаплашгани акс этган. Унда Кудрявцев режа бўйича Навальний тирик қолмаслиги керак бўлганини тан олган.
Қўнғироқ 14 декабрь куни амалга оширилган. Навальний ўзини Россия хавфсизлик кенгаши котиби Николай Патрушевнинг ёрдамчиси деб таништирган ва раҳбариятга ҳисобот бериши кераклигини айтиб ундан изоҳ сўраган.
Қўнғироқ қилаётган пайтда Навальний Кудрявцевнинг Омскка учгани ва ундан олдин эса уни кузатгани ҳақида хабари бўлган. Мухолифатчига бу ҳақда Bellingcat ва The Insider хабар беришган.
Навальнийнинг нега ушбу операция ўлим билан якунланмагани ҳақидаги саволига ФСБ ходими унда аниқ маълумот йўқлигини, бироқ ҳаммаси пухта режалаштирилганлигини айтган. Муваффақиятсизликни эса у вазият билан, яъни самолётнинг тезда қўниши ва тез ёрдамнинг тезкор чоралари билан изоҳлади.
Кудрявцев шунингдек, заҳар Навальнийнинг ич кийимига суртилган бўлгани ҳақда айтган. Навальний эълон қилган бошқа суҳбатда, ФСБнинг бошқа ходими Михаил Евдокимов Навальнийнинг кийимларини Кудрявцевга тозалаш учун берганини тан олган.
РИА Новости’нинг хабар беришича, ФСБ Навальнийнинг заҳарланиши бўйича суриштирув-текширув ишлари олиб борилиб, унга процессуал баҳо берилишини эълон қилган.
