Тошкентда камерунлик фуқарони гаровда сақлаб, унга турли тан жароҳатлари етказган жиноий гуруҳ қўлга олинди. Бу ҳақда «Тошкент» телеканалидаги дастурда маълум қилинди.
Маълум бўлишича, Ш. Р. 2019 йилнинг 27 май кунида жиноий тўдаси билан биргаликда камерунлик Ж. М.ни ўғирлаб кетиб, тўрт кун давомида тутқунликда сақлаган.
Воқеага камерунлик Марк ва Уилям исмли фуқароларнинг қилган иши сабаб бўлгани айтиб ўтилди. Хабарга кўра, улар 2019 йил бошида Ўзбекистонга фирибгарлик йўли билан пул топиш учун келишган ва ўзбекистонлик Ш. Р. одамларини алдаб, 20 минг AҚШ долларини олиб кетишган. Ушбу вазиятдан сўнг Ш. Р. ва унинг жиноий тўдаси камерунлик Марк ва Уилямни Ўзбекистонга чақириб, мўмай даромад топишлари мумкинлиги ҳақида айтишади. Лекин камерунлик фирибгарлар Ўзбекистонга ўзлари келмасдан Ж.М. исмли шахсни жўнатади.
Ж.М. Ўзбекистонга келгач, Ҳ.Ф. ва Қ.А. исмли шахслар уни шаҳар айлантириш баҳонасида Яшнободдаги хонадонга бошлаб боришган.
«Ҳовлига кирганимда бу ернинг ҳолатини кўриб қўрқиб кетдим. Кетмоқчи бўлганимда улар мени ичкарига мажбурлаб олиб киришга ҳаракат қилишди. Шунда ичкаридан Т. исмли йигит чиқиб келиб, мени судраб уйга олиб кирди. Оғзимга латта тиқиб, оёқ-қўлимни боғлаб, музлаткич ёнига ётқизиб қўйишди. Бошимни, жағимни деворга уришди. Ҳозир бу жойни оқлаб ташлашибди», — деди Ж.М. воқеа ҳақида сўзлаб бераётиб.
Ж.М. тўрт кун давомида тутқунликда сақланиб, тан жароҳатлари етказилган ва бу ҳол видеога олиниб, Марк ва Уилямга юборилган.
Хабарда айтилишича, жиноий гуруҳнинг мақсади 60 минг AҚШ доллар ишлаш бўлган. Aгар айтилган суммани беришмаса, Ж.М.ни ўлдириш билан таҳдид қилинган. Тўрт кун ўтиб Камерундан сўралган пулларни жўнатишга рози эканлиги ҳақида хабар келади. Бу хабардан сўнг жиноий тўда аъзолари Ж.М.ни хонадондан олиб чиқиб, Яшнобод тумани Жарқўрғон кўчасида жойлашган «Геликон» меҳмонхонасига олиб боришади.
Бу вақт давомида Ташқи ишлар вазирлигига Франция элчихонасидан Ж.М.нинг ўғирлаб кетилгани ҳақида хабар келиб тушган. ДХХ томонидан тезкор қидирув ишлари бошланган ва бу жараён якунланмасдан тутқундаги камерунлик фуқаро қочиб кетишга улгурган.
Оқибатда жиноий гуруҳга нисбатан жиноий иш қўзғатилган ва ушбу жиноий ишга алоқадор бўлган 15 киши қўлга олинган. Уларга нисбатан Жиноят кодексининг 245-моддаси 1-қисми (шахсни гаров сифатида тутқунликка олиш) билан жиноят иши қўзғатилиб, Ш. Р. ва жиноий гуруҳнинг бошқа аъзоларига 5 йил муддатга озодликдан маҳрум қилиш жазоси тайинланди.
