ЖССТ вакили Мелита Вуйновичнинг сўзларига кўра, кейинги бир неча ой ичида COVID-19 билан боғлиқ вазият жуда қийин бўлади. Бир кун олдин ЖССТ раҳбари Тедрос Гебреисус ҳам вазиятнинг оғир эканлиги ҳақида эълон қилган эди.
Жонс Хопкинс университети маълумотларига кўра, ҳозирда Буюк Британияда COVID-19 билан касалланганлар сони миллион нафардан ошди ва бу борада дунёдаги тўққизинчи мамлакатга айланди. Буюк Британиядагидан ҳам ёмонроқ натижа Европада фақат Франция (1,46 млн) ва Испанияда (1,24 млн) кузатилмоқда.
Ўтган ҳафта давомида Чехия ҳар 100 минг аҳоли ҳисобига COVID-19 қурбонларининг тўғри келиш сонига кўра дунёда биринчи ўринни эгаллади. Чехияда бу кўрсаткич 11.02 га етди. У бу кўрсаткич бўйича 100 минг кишига ушбу инфекциядан 7,88 та ўлим ҳолати тўғри келаётган Андоррани ортда қолдирди. Кейинги ўринларни Европа мамлакатлари орасида Бельгия (6.81), Арманистон (6.19) эгаллади ва Черногория (6.11) эгаллаб турибди.
Жонс Хопкинс университетининг ҳозирги маълумотларига кўра, дунёда 47 млн дан ортиқ одам COVID-19 инфекциясини юқтирган, улардан 1,2 млн нафари вафот этган.
«Ҳаракат учун жуда муҳим давр келди. Барча одамларнинг умумий мақсад йўлида бирлашишлари учун жуда муҳим лаҳза. Кеч бўлмасдан фурсатдан фойдаланишимиз керак», — деди ЖССТ раҳбари Тедрос Гебреисус.
Вируснинг янги штамми
Швейцария ва Испания олимлари COVID-19 нинг янги штаммини аниқлашди. Коронавируснинг янги тури 20A.EU деб номланди. У Испаниянинг шимоли-шарқида ёзда пайдо бўлган ва тадқиқотга кўра биринчи марта қишлоқ хўжалиги ишчиларида аниқланган. Буни аниқлаш учун Базель университети олимлари бутун Европадан келган коронавирус беморларининг вирусли геномлари кетма-кетлигини таҳлил қилиб, таққослашди.
Тадқиқотчилар маълумотларига кўра, янги коронавирус 20A.EU1 Буюк Британияда тарқалган коронавирус инфекциясининг 90%, Ирландияда 60%, Швейцария ва Голландияда эса 30−40% ни ташкил қилади. Таъкидланишича, вируснинг ушбу варианти Европада энг кенг тарқалган вариантлардан биридир. Шунингдек, у Бельгия, Германия, Франция, Италия, Латвия, Норвегия ва Швецияда ҳам топилган.
Карантин чоралари
Карантин чораларини қайта жорий қилган биринчи Европа мамлакати Ирландия бўлди. Кейинчалик эса худди шундай қарорни Франция (30 октябрдан) ва Германия (2 ноябрдан) қабул қилди.
Португалия эса қисман карантин жорий қилишга қарор қилди. Унга кўра, фуқаролар дўконларга, иш жойларига боришлари ва шифокорлар ҳузурига ташриф буюришлари мумкин. Шунингдек, ресторанлар ҳам карантин қоидаларига амал қилган ҳолда фаолиятини давом эттириши мумкин.
Австрия ҳукумати эса 3 ноябрдан мамлакатда янги умумхалқ карантинини эълон қилди. Буюк Британияда ҳам 5 ноябрдан бошлаб ресторанлар, паблар, ноозиқ-овқат дўконлари вақтинчалик ёпилади ва уйдан чиқиш чеклаб қўйилади. Бу чекловлар камида 2 декабргача сақлаб қолинади.
Норозилик намойишлари
31 октябрь куни Германиянинг бир қатор шаҳарларида карантин чекловларига қарши намойишлар ва тадбирлар бўлиб ўтди. Дрезден, Карлсруэ, Дармштадт каби шаҳарларда намойишлардан сўнг юзлаб одамлар ҳимоя ниқобисиз кўчага чиқиб, ўз норозиликларини кўрсатишди.
Германия канцлери Ангела Меркель бунга жавобан «агар ноябрда барчамиз ўзимизни оқилона тутсак, Рождество байрамига қадар биз кўпроғига эришишимиз мумкин», дея ваъда берди 2 ноябрь куни Берлинда бўлиб ўтган матбуот анжуманида.
Карантин чораларига қарши ҳаракатлар Испанияда ҳам бўлиб ўтди. Мамлакат шаҳарларида радикал ёшлар қаттиқ карантин чоралари ва давлатнинг ишсизларга ёрдам бермаётгани сабабли норозилик билдиришди. 31 октябрь куни Барселона шаҳрида юзлаб ёшлар кўчаларни тўсиб қўйишди, чиқинди контейнерлари ва машиналарини, шунингдек, полиция микроавтобусларини ёқиб юборишди, дўконлар деразаларини синдиришди, полицияга тош ва бутилкаларни улоқтиришди. Намойишчилар ва полициячилар тўқнашуви оқибатида 30 дан ортиқ киши, шу жумладан 20 нафар полициячи жароҳат олди. Ўнлаб намойишчилар қўлга олинди. Улар асосан мамлакат ҳукумат ва ҳудудий маъмурият истеъфосини талаб қилаётган эди.
МДҲда
Россияда бир кун ичида 18 648 та янги COVID-19 юқтириш ҳолатлари қайд этилди, ушбу инфекциядан 355 киши вафот этди. Соғайган беморларнинг сони эса рекорд кўрсаткич — 15 331 кишига етди.
Шунингдек, Украинада беморлар учун бўш жойлар деярли қолаётгани ва вазиятнинг оғир эканлиги ҳақида айтилмоқда. 3 ноябр куни Украинада 8899 та янги касаллик юқтириш ҳолатлари қайд этилди (шундан 346 нафари болалар, 401 нафари соғлиқни сақлаш ходимлари). Ҳаммаси бўлиб кунига 1207 киши касалхонага ётқизилган, 157 бемор вафот этган, 5100 киши эса соғайган. Эпидемия бошланганидан бери мамлакатда 400 мингдан ортиқ киши COVID-19 инфекцияси юқтирган
Қозоғистонда коронавирусга чалиниш бўйича кескин ўсиш кузатилганлиги сабаб мамлакат чегарасини 90 кун ичида бир мартадан ортиқ кесиб ўтиш тақиқлаб қўйилди ва 57 мамлакат учун визасиз режим вақтинчалик тўхтатилди. Қозоғистонда 19 октябрь — 1 ноябрь кунлари оралиғида 3352 та касалланиш ҳолати қайд этилган.
