Кейинги ҳафтадан Ўзбекистон аҳолиси орасида коронавирус инфекциясининг антитаначаларини текшириш учун тестлар ўтказиш бошланади. Бу ҳақда АОКАда ўтказилган брифингда коронавирусга қарши кураш штаби ходими Хабибулла Оқилов маълум қилди.
Унинг сўзларига кўра, ҳозирга қадар Ўзбекистонда COVID-19 билан касалланганларни аниқлаш, уларни даволаш, вирус юқтирган беморлар билан мулоқотда бўлганларни эса карантинга олиш масалалари билан шуғулланилди.
«Коронавирусни аниқлаш учун ПЗР (полимераза занжири реакцияси — таҳр.) таҳлили лозим бўлади. Антитаначалар шаклланиши учун эса вирус юқтирган беморлар тузалиб чиққан бўлиши лозим», — деди у.
Тошкент тиббиёт тадқиқотлари институти ректори Хабибулла Оқиловнинг таъкидлашича, иммунофермен таҳлили орқали антитаначаларни аниқлаш карантин тадбирларини босқичма-босқич юмшатиш учун зарурдир.
Бугунги кунда турли мамлакатларда яшовчилар COVID-19 га қарши иммунитет учун синовдан ўтишмоқда. 1 июнь куни Японияда фавқулодда ҳолат режимининг бекор қилиниши муносабати билан қанча инсон инфекция юқтирганини тушуниш учун антитаначаларни аниқлаш тестлари бошланди. Синов натижалари, вакцина яратилгач, ундан қанча керак бўлишини аниқлашга ҳам ёрдам беради.
Москвада эса аҳолини коронавирусга қарши иммунитетни тестдан ўтказиш 15 май куни бошланган. Дастлаб, унда фақат электрон почта ёки СМС орқали таклиф олганлар иштирок этишлари мумкин эди. 27 майдан бошлаб ҳамма хоҳловчилар синовдан ўтмоқда. 50 минг киши текширилганидан сўнг, уларнинг 12,5 фоизида антитаначалар аниқланган.
Апрель ойи охирида Жаҳон соғлиқни сақлаш ташкилоти бир марта коронавирусдан тузалиб, иммунитетида антитаначалар шаклланган инсон иккинчи марта касаллик юқтириб олмаслиги борасида ишончли далиллар йўқлигини таъкидлади.
Антитаначалар аслида нима? Антитаначалар — бу жуда катта ва мураккаб оқсил молекулаларидир. Улар организмда B-лимфоцит қон ҳужайралари томонидан ишлаб чиқарилади. Айрим турдаги антитаначалар вирусни зарарсизлантириш қобилиятига эга бўлади. Аммо коронавирусни зарарсизлантирадиган антитаналар организмда нисбатан кам миқдорда ишлаб чиқарилади. Шу сабабли, коронавирусга қарши вакцина яратиш анча қийин. Вакцина эса инсон танасида (яъни унинг B-лимфоцитларида) айнан зарарсизлантирувчи антитаначаларни ишлаб чиқаришни ва шу билан ўзларини хавфли инфекциялардан ҳимоя қилишни ўргатадиган дори воситасидир.
