Hyundai компанияси 2023 йилгача «Қўқон» эркин иқтисодий зонасида серияли автомобиль ишлаб чиқаришни режалаштирмоқда, дея хабар қилди «Ўзбекистон 24» телеканалининг «Янгиликлар 24» дастури.
Ишлаб чиқариш қуввати йилига 10 минг дона электромобиль бўлган завод қурилиши 2021 йилда бошланиши лозим. Умумий қуввати 300 млн доллар бўлган лойиҳада Жанубий Кореянинг Hyundai, Evergreen Motors (KIA ва Hyundai компанияларининг МДҲдаги расмий дистрибьютори) компаниялари, Инвестициялар ва ташқи савдо вазирлиги ва Фарғона вилояти ҳокимияти иштирок этмоқда.
Лойиҳа ишга туширилиши натижасида 1000 та янги иш ўрни ташкил этилади.
Бу Hyundai компаниясининг автомобилсозлик соҳасидаги ягона лойиҳаси эмас. Компания юк кўтариш имконияти 1 дан 50 тоннагача бўлган юк автомобиллар, шаҳарлараро ва туристик автобуслар, шунингдек махсус транспорт воситаларини йиғишни ҳам йўлга қўйишни мўлжалламоқда.
Аввалроқ Хитойнинг Changan Automobile электромобиллар ишлаб чиқарувчиси Ўзбекистон бозорига қизиқиш билдираётган ҳақида хабар қилинган эди.
