Ўзбекистондаги энг йирик СПА соғломлаштириш маркази бўлиши кутилаётган Зангиота термал соғломлаштириш мажмуасини барпо этиш лойиҳасига Бельгиядан маслаҳатчи жалб қилинади. Бу ҳақда ТИВ матбуот хизмати хабар қилди.
5 январь куни Брюсселдаги Ўзбекистоннинг Бенилюкс мамлакатларидаги элчихонасида Asia tour Elite компанияси раҳбари Акмал Қосимов ва «Юкон» компанияси юридик директори Жеан де Брабандер бу ҳақдаги шартномани имзолади.
Лойиҳа 400 ўринли меҳмонхона ҳамда санатория, ҳам таянч тиббий муолажаларни кўрсатишга мўлжалланган мажмуа қурилишини ўз ичига олади. Мажмуа хизматларидан нафақат Ўзбекистон, балки қўшни давлатлар фуқароларининг ҳам фойдаланиши кутилмоқда.
Хорижлик консультант шу каби туристик мажмуаларни амалга ошириш тажрибасига эга халқаро инвесторни аниқлаш, инвестицион меморандумни шакллантириш, юридик ҳужжатларни ишлаб чиқиш ва уларнинг имзоланиши бўйича комплекс хизматларни кўрсатади.
