Жорий йилнинг 15 сентябрида Ўзбекистон Республикаси Вазирлар Маҳкамасининг «Ўсимликлар клиникалари фалиятини ташкил этиш чора-тадбирлари тўғрисида"ги қарори чиқди. Бу ҳақда «Ўздавкарантин» инспекцияси матбуот хизмати хабар берди.
Президентнинг жорий йилнинг 28 мартидаги «Ўсимликлар карантини бўйича давлат хизмати фаолиятининг самарадорлигини оширишга доир қўшимча чора-тадбирлар тўғрисида"ги қарорида Қорақалпоғистон Республикаси Вазирлар Кенгаши ва вилоятлар ҳокимликлари «Ўздавкарантин» инспекцияси, бошқа манфаатдор вазирлик ва идоралар билан биргаликда ўсимликлар клиникаси фаолиятини йўлга қўйиш бўйича барча зарур ташкилий-ҳуқуқий чора-тадбирларни кўриш белгилаб қўйилган эди. Ҳужжатга кўра, ўсимликлар клиникаси 2018 йилнинг 1 июлидан 2022 йилнинг 1 январига қадар ер солиғи, юридик шахсларнинг даромад ва мол-мулк солиғидан ҳамда ягона солиқ тўловларини тўлашдан озод этилади.
Президент қарори ижросини таъминаш ҳамда Ўсимликлар клиникалари фаолиятини тартибга солиш, уларнинг кейинчалик фаолият кўрсатиши соҳасида давлат-хусусий шерикликни ривожлантириш учун қулай шарт-шароитларни таъминлаш мақсадида Вазирлар Маҳкамасининг ушбуқарори имзоланди.
Ўзбекистонда ўсимликларнинг агротехник, биологик ва кимёвий ишловини амалга ошириш учун шу кунга қадар республиканинг барча ҳудудларида 120 дан зиёд Ўсимликлар клиникалари ташкил этилди. Қарорда фойдаланилмаётган бўш турган бинолар ва хоналар «Ўздавкарантин» инспекцияси билан тузилган давлат-хусусий шериклик тўғрисидаги битимлар асосида ўсимликлар клиникаларини ташкил этиш учун «ноль» ҳарид қиймати бўйича сотилишини ёхуд узоқ муддатга бепул фойдаланиш учун берилишини таъминлаш белгиланган.
Бундан ташқари мазкур хужжатга кўра, давлат-хусусий шерикчилиги асосида ташкил этилган Ўсимликлар клиникаларига қўйиладиган асосий талаблар қуйидагилардан иборат:
- зарарсизлантириш бўйича камида тўрт нафар кишидан иборат отрядлар ташкил этиш ҳисобига ўсимликларга агротехник, биологик ва кимёвий ишлов бериш хизматларини кўрсатиш;
- қишлоқ хўжалиги ишлаб чиқарувчилари ва аҳолини ўсимликларни ҳимоя қилишнинг кимёвий, биокимёвий, биологик ва механик воситалари, ўсимликлар зараркунандалари ва касалликларига қарши курашиш бўйича воситалар, шу жумладан:
феромон тутқичлар;
зараркунандаларга қарши курашиш учун биомахсулотлар;
гирбицитлар, фунгицидлар, инстектицидлар, инстектоакарицидлар,
нематоцидлар ва биопрепаратлар билан таъминлаш;
- узлуксиз сотишни таъминлаш учун кимёвий, биокимёвий, биологик, механик воситалар, приборлар ва преператларнинг минимал ассортименти мажбурий мавжуд бўлиши;
- бинолар ва хоналарга қўйиладиган экологик талаблар, санитария нормалари, қоидалари ва гигеник нормативларга риоя қилиш;
- зараркунандалар, касалликлар ва бегона ўтларни аниқлаш учун тегишли лаборатория ускунаси, инвентарь мавжуд бўлиши, шунингдек, ўсимликларга ишлов бериш учун кимёвий, биокимёвий ва биологик воситаларни тайёрлаш ҳамда қадоқлаш.
Юқорида келтирилган талабларнинг назорати Ўзбекистон Республикаси Вазирлар Маҳкамаси ҳузуридаги Ўсимликлар карантини давлат инспекцияси томонидан амалга оширилади.
Уларда ўсимликларнинг зарарланиш даражасини аниқлаш ҳамда унинг олдини олиш, чидамли экин турларини экиш бўйича тавсиялар бериш, уларга қарши самарали (биологик, кимёвий) курашиш чораларини кўриш, аҳоли томорқаларида етиштирилган маҳсулотлар сифатини бўйича тавсиялар бериш каби хизматлар кўрсатилади.
Ўсимликларга агротехник, биологик ва кимёвий ишлов бериш бўйича хизматлар кўрсатиш, шунингдек, ўсимликлар зараркунандалари ва касалликларига қарши курашиш бўйича қишлоқ хўжалиги ишлаб чиқарувчилари ва аҳолини кимёвий, биологик ва механик воситалар билан таъминлаш ва тўғри ишлов бериш ўсимликлар клиникаларининг асосий вазифалари ҳисобланади.
