«Ўзбекистон ҳаво йўллари» Миллий авиакомпанияси ва Boeing корпорацияси яна бир Boeing 787−8 Dreamliner йўловчи лайнерини етказиб бериш тўғрисидаги шартномани имзолади.
Шундай қилиб, МАК матбуот хизматининг хабар қилишича, Ўзбекистон миллий авиаташувчиси 2020 йилгача ушбу турдаги олтита авиалайнерга эга бўлади.
Май ўртасида етказиб берилиши кутилаётган ҳисобдаги учинчи «Орзу лайнери» аввалги икки Boeing 787−8 Dreamliner самолётидан йўловчилар учун ўриндиқлар сонининг 270 тага ортгани (бизнес-класс — 24, эконом-класс — 246) ва экипаж дам олиши учун махсус бўлма билан фарқ қилади.
Янги лайнерда ҳам авиакомпаниянинг бошқа Boeing-787 ҳаво кемаларидаги каби ёнилғи тежаш самарадорлигини ошириш, шовқин даражасини пасайтириш ва атмосферага CО2 ажраб чиқишини камайтириш имконини берувчи GE Aviation компаниясининг GEnx-1 В двигателлари ўрнатилган.
«Ўзбекистон ҳаво йўллари» Марказий Осиёда Boeing-787 Dreamliner самолётларига буюртма берган биринчи буюртмачидир. 2017 йил 27 июлда Ўзбекистон миллий авиаташувчиси тарихда биринчи марта «Орзу лайнери"да Тошкентдан Нью-Йоркка илк узлуксиз парвозини амалга оширди.
Тўртта янги Boeing-787 Dreamliner авиалайнерини сотиб олиш тўғрисидаги келишувга корпорация президенти Рэймонд Коннернинг 2016 йил сентябрда Ўзбекистонга ташрифи вақтида эришилган, шартнома эса 2017 йил январида имзоланган эди. Янги «Орзу лайнерлари"нинг 2019−2020 йилларда етказиб берилиши режалаштирилган.
