Defektolog, logoped Dilorom Jabborovaga nisbatan duduqlangan bolani so‘kinish va qo‘rqitish usulida davolashga uringani ortidan jinoyat ishi qo‘zg‘atildi. Bu haqda bolalar ombudsmani xabar berdi.
O‘tgan yilning dekabr oyida u Jizzax shahrida o‘tkazilgan seminar davomida bir bolani davolayotgani aks etgan video tarqalgan va holat ombudsman nazoratiga olingandi.
Qayd etilishicha, Dilorom Jabborovaning ish uslubiga ilmiy va kasbiy baho berish uchun kiritgan so‘rov asosida defektolog va logopedlardan iborat ishchi guruh o‘rganish o‘tkazgan.
Natijada pedagogning ish usuli mutlaqo ilmiy asoslanmagan, murakkab duduqlanish muammosiga tor va ibtidoiy yondashuvda ekani, Jabborovaning duduqlanishni bartaraf etishda qo‘llayotgan ruhiy va jismoniy zo‘ravonlik usullari bolalarning sog‘lig‘i va tarbiyasiga jiddiy zarar keltirishi hamda pedagogika qoidalariga butunlay zidligi to‘g‘risida xulosa berilgan, deyiladi ombudsman xabarida.
Ekspertlar ishchi guruhi xulosasi va aniqlangan boshqa holatlar asosida uning harakatlarida aldash va odamlar ishonchini suiiste’mol qilish yo‘li bilan o‘zganing mulkini va uning mulkiga bo‘lgan huquqni qo‘lga kiritishda ifodalangan jinoyat alomatlari mavjudligi aniqlangan.
27-fevral kuni Jinoyat kodeksining 168-moddasi 1-qismi (Firibgarlik) bilan jinoyat ishi qo‘zg‘atilgan.
Hozirda Yunusobod tumani IIO FMB tergov bo‘limi tomonidan jinoyat ishi yuzasidan dastlabki tergov harakatlari olib borilmoqda.
Ma’lumot uchun, Dilorom Jabborovaning Instagram sahifasida 538 ming obunachisi bor, YouTube`da esa uni 25 mingdan, Telegram`da 8000 mingdan ortiq kishi kuzatadi.
