Samarqand shahrida Buyuk ipak yo‘li davlat muzeyini tashkil etish, Amir Temur bog‘larini qayta tiklash, Bibixonim majmuasini restavratsiya qilish, shuningdek, YUNESKOning Butunjahon merosi ro‘yxatiga kiritilgan Buxoroning tarixiy markazini muhofaza qilishga qaratilgan master va menejment rejalari to‘g‘risida qarorlar loyihalari ishlab chiqiladi.
Madaniyat va san’atni rivojlantirish jamg‘armasiga berilgan mazkur ko‘rsatma prezident Shavkat Mirziyoyevning 2025-yilda Samarqand shahrida bo‘lib o‘tadigan YUNESKO — Birlashgan Millatlar Tashkilotining Ta’lim, fan va madaniyat masalalari bo‘yicha tashkiloti Bosh konferensiyasining 43-sessiyasiga tayyorgarlik ko‘rish to‘g‘risidagi qarorida keltirilgan. Forum 1985-yildan beri birinchi marta Parijdan tashqarida o‘tkaziladi.
Jamg‘arma yuqoridagi hujjatlarni YUNESKO mezonlari asosida va xorijiy ekspertlarni jalb qilgan holda ishlab chiqishi kerak, deyiladi qarorda.
Shuningdek, Tashqi ishlar vazirligiga YUNESKO bosh direktori nomiga O‘zbekiston Respublikasining Madaniy yodgorliklarni saqlash va restavratsiya qilish bo‘yicha xalqaro tadqiqot markaziga a’zo bo‘lishi uchun rasmiy ariza topshirildi.
Bundan tashqari, YUNESKO ishlari bo‘yicha Milliy komissiyaga O‘zbekistondagi shaharlar, noyob madaniy va tabiiy meros obyektlarini tegishlicha YUNESKOning Ijodkor shaharlar hamda Ta’limni targ‘ib etuvchi shaharlar tarmoqlariga, shuningdek, xalqaro ro‘yxatlariga kiritish choralarini ko‘rish topshirildi.
Buxoro madaniy merosi obidalarini saqlash holati avvalroq 2023-yil sentabr oyida bo‘lib o‘tgan YUNESKO Butunjahon merosi qo‘mitasining 45-sessiyasida ko‘rib chiqilgan edi. Keyingi sessiya joriy yilning iyul oyida bo‘lib o‘tadi.
Qo‘mita o‘z qarorida O‘zbekiston hukumatining tarixiy markazni rivojlantirish va yangi ishlarga qo‘yilgan moratoriyni keng qamrovli master va menejment rejalari ishlab chiqilgunga qadar moratoriyga bufer zonani kiritish orqali kengaytirish to‘g‘risidagi qarorini olqishladi.
