Rossiyalik shaxmatchi Anastasiya Bodnaruk 26−28-dekabr kunlari Samarqand shahrida rapid (tezkor shaxmat) bo‘yicha o‘tkazilgan jahon chempionatida g‘olib bo‘ldi, deb xabar bermoqda “Gazeta.uz” muxbiri.
Anastasiya Bodnaruk va Xampi Koneru. Foto: Husniddin Ato / PressPhotoUz
Yakuniy 11-tur natijalariga ko‘ra, Bodnaruk, shuningdek, Xampi Koneru (Hindiston) va Ley Tinsze (Xitoy) 8,5 ochko jamg‘arib, turnir jadvali yuqorisida joylashdi. Qo‘shimcha ko‘rsatkichlarga ko‘ra, Bodnaruk va Koneru birinchi o‘rin uchun tay-breyk o‘tkazish huquqini qo‘lga kiritdi, xitoylik shaxmatchi esa bronza medali bilan cheklandi.
Tay-breyk bahslarida Rossiya vakilasi raqibini 2,5−1,5 hisobida mag‘lub etdi.
Rapid va blits bo‘yicha jahon chempionatida rossiyalik sportchilar Xalqaro shaxmat federatsiyasi (FIDE) bayrog‘i ostida qatnashmoqda.
O‘zbekiston vakilalari orasida eng yaxshi natijani yaqinda 14 yoshgacha bo‘lgan qizlar o‘rtasidagi jahon chempionatida g‘olib chiqqan Afruza Hamdamova ko‘rsatdi. U 6,5 ochko jamg‘arib, 117 nafar shaxmatchi orasida 34-o‘rinni egalladi.
Umida Omonova 5,5 ball bilan 57-o‘rinni egalladi. O‘zbekistonlik boshqa 11 nafar sportchi esa turnir jadvalining quyi qismida joylashgan.
Rapid chempionatining ochiq turnirida norvegiyalik Magnus Karlsen chempionlik unvonini saqlab qoldi.
29−30-dekabr kunlari Samarqand shahrida blits bo‘yicha jahon chempionati bo‘lib o‘tadi.