Toshkent viloyati Quyi Chirchiq tumani xaritasida Konstitutsiya nomli sirli aholi yashash punkti bor. Joriy hafta boshida “Gazeta.uz"ning maxsus bo‘limi u yerga borib, “Konstitutsiya hayotidan bir kun” nomli reportaj tayyorlab kelmoqchi edi. Ammo Quyi Chirchiq tumani hokimligi uning hududida bunday nomli aholi manzilgohi yo‘qligini ma’lum qildi.
Bundan bizning ko‘nglimiz cho‘kib, yo‘lga chiqmadik, tabiiyki. Ammo media-bo‘limimiz tinib-tinchimas, hech qachon tushkunlikka tushmaydigan boshlig‘i Yevgeniy Sorochin bu safar ham vaziyatdan chiqish yo‘lini topdi: “Konstitutsiya hayotida bir kun” bo‘lmasa, unda “Konstitutsiya hayotidan bir soat” bo‘laqolsin deya Toshkentdagi Konstitutsiya ko‘chasiga borib keldi.
