Тошкент вилояти Қуйи Чирчиқ тумани харитасида Конституция номли сирли аҳоли яшаш пункти бор. Жорий ҳафта бошида «Газета.uz»нинг махсус бўлими у ерга бориб, «Конституция ҳаётидан бир кун» номли репортаж тайёрлаб келмоқчи эди. Аммо Қуйи Чирчиқ тумани ҳокимлиги унинг ҳудудида бундай номли аҳоли манзилгоҳи йўқлигини маълум қилди.
Бундан бизнинг кўнглимиз чўкиб, йўлга чиқмадик, табиийки. Аммо медиа-бўлимимиз тиниб-тинчимас, ҳеч қачон тушкунликка тушмайдиган бошлиғи Евгений Сорочин бу сафар ҳам вазиятдан чиқиш йўлини топди: «Конституция ҳаётида бир кун» бўлмаса, унда «Конституция ҳаётидан бир соат» бўлақолсин дея Тошкентдаги Конституция кўчасига бориб келди.
