16-noyabr kuni Toshkentda bo‘lib o‘tayotgan “Ipak yo‘lidagi turizm” TITF2023 ko‘rgazmasi doirasida Yevrosiyo tog‘ kurortlari alyansi (ETKA) taqdimoti bo‘lib o‘tdi, deb xabar berdi “Gazeta.uz”ga tashkilotchilar.
Alyans iyun oyida tuzilgan va unga O‘zbekistondagi “Amirsoy”, Qozog‘istondagi “Shimbuloq” va Rossiyadagi “Rosa Xutor” oromgohlari kirgan.
Taqdimotda dam olish maskanlari vakillari yangi alyansning maqsad va vazifalari, joriy qish mavsumida rejalashtirilgan qo‘shma tadbirlar haqida so‘z yuritdi.
Alyans kelgusi yil uchun uchta kurortda o‘tkaziladigan sport, madaniy va ko‘ngilochar tadbirlarning umumiy taqvimini taqdim etdi, ularga tashrif buyurgan sayyohlar ishtirok etish uchun ma’lum bonuslarga ega bo‘lishlari mumkin. Bundan tashqari, ushbu bonuslar alyansning uchta kurortidan istalganida xizmat haqini to‘lash uchun ishlatilishi mumkin, dedi uning vakillari.
Taqdimot marosimida alyans 2024-yil mart oyida Sochidagi “Rosa Xutor” kurortida Tog‘ kurortlari festivalini o‘tkazishi ma’lum qilindi. Uning dasturi alyans tashkilotchilari tomonidan tog‘ chang‘isi va snoubord bo‘yicha bepul mahorat darslari, gastrofestival, folklor dasturi, tog‘ kurortlari xodimlari uchun o‘quv moduli va kurort faoliyatining dolzarb jihatlari bo‘yicha professional muhokamalarni o‘z ichiga oladi.
Alyans vakillari davlatlararo sayyohlik marshruti qanday ishlab chiqilayotgani, uchta kurortda yagona tog‘-chang‘i yo‘llanmasini joriy etish imkoniyatlari haqida ham so‘zlab berdi.
Bundan tashqari, alyansga Ozarbayjonning eng yirik tog‘ kurorti “Shahdag” qo‘shildi. Tegishli memorandumni alyansning barcha dam olish maskanlari vakillari va “Shahdag” tog‘ kurorti rahbari Rustam Najafov imzoladi.
“Umumiy maqsadimiz — turizm va mehmondo‘stlik sohasida yangi yo‘nalishlarni kashf etish, sifat va raqobatbardoshlikni oshirish, turizm madaniyatini yangi bosqichga olib chiqish, — deydi “Amirsoy” tog‘ kurorti bosh direktori Saidvali Saidxo‘jayev. “Ishonchim komilki, alyans xalqaro turizmni rivojlantirish bilan bog‘liq yangi g‘oyalar va loyihalarni yaratish, shuningdek, xavfsiz, yashil va arzon turizmni rivojlantirish uchun muhim va foydali platformaga aylanadi”.
Alyans kotibi Andrey Kukushkinning aytishicha, hozirda ETKAni yuridik shaxs sifatida ro‘yxatdan o‘tkazish jarayoniga tayyorgarlik ko‘rilmoqda, u ixtiyoriy jamoat birlashmasi bo‘ladi. Tashkilot kotibiyati Qozog‘istonning Olmaota shahrida bo‘ladi.
