3-noyabr kuni Toshkentda Urganchdagi mehribonlik uyi tarbiyalanuvchilari bilan jinsiy aloqada bo‘lgan ikki nafar sobiq amaldorga nisbatan apellyatsiya instansiyasida sud hukmi o‘qildi.
Unga ko‘ra, 2022-yil 6-sentabrdagi hukmning Xorazm viloyati adliya boshqarmasining sobiq boshlig‘i Oybek Masharipov va Yangiariq tuman FVB sobiq boshlig‘i Anvar Kuryazovga oid qismi bekor qilindi. Ular Jinoyat kodeksining oldingi tahrirdagi 128-moddasi (O‘n olti yoshga to‘lmagan shaxs bilan jinsiy aloqa qilish) 1-qismi va 128−1-moddasi (O‘n olti yoshdan o‘n sakkiz yoshgacha bo‘lgan shaxsga moddiy qimmatliklar berish yoxud uni mulkiy manfaatdor etish orqali u bilan jinsiy aloqa qilish)da nazarda tutilgan jinoyatlarni sodir etganlikda aybli deb topildi.
Ularning har biriga uzil-kesil 3 yil muddatga ozodlikdan mahrum qilish jazosi tayinlandi.
Sud qukmi e’lon qilingan kunning o‘zida AOKAda Oliy sud raisi o‘rinbosari Ikrom Muslimov va bosh prokuror o‘rinbosari Svetlana Artikova hukm yuzasidan brifing o‘tkazib, chiqarilgan sud hukmi bo‘yicha tushuntirish berdi. Unda “Gazeta.uz” muxbiri ham qatnashdi.
“Oliy Sud plenumi alohida qaror ham qabul qilib, nomusga tegish jinoyatlari tasdig‘i berilgan va shunda zo‘rlik, qo‘rqitish, jabrlanuvchining ojizligidan foydalanish tushunchalariga ta’rif berilgan. Qo‘shimcha protsessual harakatlar o‘tkazilganda ikki nafar sudlanuvchining harakatlarida zo‘rlik, qo‘rqitish, jabrlanuvchining ojizligidan foydalanish va shu orqali ular bilan jinsiy aloqa qilish holati o‘z tasdig‘ini topmadi. Bizning fikrimizcha, tergov organi bitta sudlanuvchiga 135-moddaning 3-qismi „a“ bandi bilan uning harakatlari to‘g‘ri malakalangan”, — dedi bosh prokuror o‘rinbosari, Adliya katta maslahatchisi Svetlana Artikova.
Jinoyat ishlari bo‘yicha sudlov hay’ati raisi Ikrom Muslimov esa ikki mansabdorning harakati ijtimoiy xavfi katta bo‘lmagan jinoyatlar toifasiga kirishini aytib o‘tdi.
“Jinoyat qonuniga ko‘ra, Masharipov bilan Kuryazovning aybiga e’lon qilingan 128-moddaning birinchi qismi va 128−1-moddaning 1-qismi ijtimoiy xavfi katta bo‘lmagan jinoyatlar toifasiga kiradi va har ikkala modda bo‘yicha ozodlikdan mahrum qilish jazosi tayinlangan. Bugungi kunda Toshkent shahar sudi hukmi bilan ularga qonunda belgilangan jazoning maksimal miqdori tayinlangan. Jinoyat kodeksining 59-moddasida bir necha jinoyatlar uchun tayinlangan jazoning yengilini og‘irrog‘i bilan qoplash, qisman va to‘liq qo‘shish yo‘li bilan uzil-kesil jazo tayinlanishi mumkin. 59-moddaning 2-qismida ijtimoiy xavfi katta bo‘lmagan, uncha og‘ir bo‘lmagan bir necha jinoyat uchun shaxsga tayinlanadigan jazo o‘sha moddada nazarda tutilgan jazodan oshib ketmasligi qayd qilingan. Shu sababli, sud 3 yil ozodlikdan mahrum qilish jazosini belgiladi”, — dedi Oliy sud raisi o‘rinbosari.
2023-yil 11-aprelda xotin-qizlar va bolalar huquqlarini himoya qilish bo‘yicha qonunlar o‘zgartirildi. Unga ko‘ra, jinoyat kodeksidagi jazo miqdorlari og‘irlashtirilgan. Biroq sud mazkur qonunni Masharipov bilan Kuryazovga qo‘llash imkoniyati cheklangan, sababi, shaxsning jinoiy javobgarligi shaxsning jinoyat qilingan vaqtda amalda bo‘lgan qonun bilan belgilanishi qayd etilgan. Ular jinoyatni hozrgi qonundan oldin sodir qilgan. Qonun uning ham manfaatini himoya qiladi. Shu bois jazo eski tahrirdagi qonun bilan tayinlandi, deya qo‘shimcha qildi u.
Shuningdek, Ikrom Muslimov Toshkent shahar sudi chiqargan hukm so‘nggi nuqta emasligini, tomonlar protest keltirishi mumkinligini eslatdi.
“Toshkent shahar sudi tomonidan chiqarilgan hukm, bu — oxirgi nuqta qo‘yilgan hukm emas. Ish bo‘yicha sudlangan, jabrlanuvchi, fuqaroviy da’vogar va javobgarlar sud qaroridan norozi bo‘lsa, shikoyat yoki prokurorga protest keltirish vakolatiga ega. Bu ish Oliy sudning kassatsiya instansiyasida ko‘rib chiqiladi. Shu sababli, bugungi brifingda aytilayotgan gaplar ish bo‘yicha yakuniy qaror degani emas”, — deya ta’kidladi Oliy sud raisi o‘rinbosari.
