O‘zbekiston prezidenti Shavkat Mirziyoyev 23-oktabr kuni AQSh Xalqaro taraqqiyot agentligi (USAID) administratori Samanta Pauer boshchiligidagi delegatsiyani qabul qildi.
U 24-oktabr kuni Samarqand shahrida bo‘lib o‘tadigan C5+1 formatidagi (Markaziy Osiyo davlatlari va AQSh) rivojlanish masalalari bo‘yicha vazirlar yig‘ilishida ishtirok etish uchun O‘zbekistonga keldi.
O‘zbekistonda USAID bilan hamkorlikda sog‘liqni saqlash, ta’lim, “yashil” energetika, agrobiznes va boshqa yo‘nalishlarda bir qator loyihalar ro‘yobga chiqarilgani va davom ettirilayotganini ta’kidlandi.
Suhbat chog‘ida 2023-yilning sentabr oyida Nyu-York shahrida BMT Bosh Assambleyasi sessiyasi doirasida bo‘lib o‘tgan “S5+1” formatidagi davlat rahbarlari sammitida erishilgan kelishuvlarni amalga oshirish yuzasidan fikr almashildi, deyiladi xabarda.
“Siyosiy islohotlar iqtisodiy islohotlar bilan birga bo‘lishi kerak”
Samanta Pauer muzokaralar yakuni bo‘yicha bergan bayonotida Shavkat Mirziyoyev bilan uchrashuv “uzoq va samarali” bo‘lganini hamda USAID va AQSh hukumatining O‘zbekiston bilan hamkorligiga oid keng ko‘lamli masalalarni qamrab olganini ta’kidladi.
Avvalroq Toshkentda Samanta Pauer USAID O‘zbekistonga sil kasalligi (3,2 million dollar), epidemiya va pandemiya xavfi (4 million dollar), biznes va xususiy sektorni mustahkamlash (3,5 million dollar) hamda mas’uliyatli va samarali mahalliy boshqaruvni yaxshilash (3,5 million dollar) uchun O‘zbekistonga 14 million dollardan ortiq mablag‘ ajratilishini e’lon qilgan edi. Bundan tashqari, mamlakatda inklyuziv ta’limni qo‘llab-quvvatlash bo‘yicha yangi dasturning birinchi yili uchun 4,5 million dollar ajratilmoqda.
Bu masalalardan tashqari, “[O‘zbekiston] prezidenti olib borayotgan iqtisodiy islohotlar va korrupsiyaga qarshi kurashga mos keladigan keng kun tartibi muhokama qilindi”, — dedi Amerika agentligi rahbari.
“Biz iqtisodiy islohotlar bilan birga olib borilayotgan siyosiy islohotlarning ahamiyatini muhokama qildik. AQSh-O‘zbekiston munosabatlarining kelajagi haqida ham gaplashdik, biz buni juda yorqin deb hisoblaymiz”, — dedi Samanta Pauer.
Uning fikricha, “ikki davlat o‘rtasidagi munosabatlar avval hech qachon bunchalik mustahkam bo‘lmagan” va “har kuni mustahkamlanib bormoqda”.
“O‘zbekiston prezidentining ustuvor yo‘nalishlaridan biri, albatta, mintaqaviy aloqalarni ta’minlash bo‘lib, USAID mintaqaviy darajada qo‘llab-quvvatlashga intilgan transport infratuzilmasi va raqamli aloqa mavjud bo‘lsa, yoshlar uchun ko‘proq ish o‘rinlarini yaratish imkonini beradi”, — dedi AQSh hukumat agentligi rahbari.
Uning so‘zlariga ko‘ra, Samarqandda mintaqadagi besh mamlakat savdo vazirlari bilan AQShning ushbu masalalarda qo‘llab-quvvatlashi muhokama qilinadi.
Samanta Pauer Toshkentda Investitsiyalar, sanoat va savdo vaziri Laziz Qudratov bilan uchrashuvda. Foto: twitter.com/PowerUSAID.
O‘zbekistonda so‘nggi yillarda amalga oshirilayotgan islohotlar dasturini qanday baholaysiz, degan savolga Samanta Pauer shunday javob berdi: “Menimcha, so‘nggi besh-olti yil ichida ko‘plab sohalarda bundan oldingi ko‘p yillarga qaraganda ko‘proq islohotlar amalga oshirildi, deb aytish to‘g‘ri bo‘ladi”.
“Odam savdosiga qarshi maxsus islohotlar va odamlar ko‘p yillardan beri kutgan genderga asoslangan zo‘ravonlikka qarshi qonun bu islohotlarning faqat ikkita misolidir”, — dedi u.
Shu bilan birga, “biz va [O‘zbekiston prezidenti] sarmoya kiritish yo‘lida byurokratiyaning kamroq to‘siq bo‘lishini xohlaymiz”.
“Ijtimoiy xizmatlarni soddalashtirish, raqamlashtirish sohasida, chuqur byurokratizatsiya deb atashimiz mumkin bo‘lgan sohalarda ham ko‘proq yutuqlarga erishish mumkin. Biz AQShda ham bu borada ishlayapmiz”, — deydi Samanta Pauer.
“Prezidentning konstruktiv muxolifatga, erkin matbuotga sodiqligini, korrupsiya qarshi qilinayotgan ishlarni ko‘rib, bu sohalarda ham rivojlanishni kutyapmiz”, — deya xulosa qildi USAID rahbari.
Samanta Pauer 2021-yil may oyida USAID rahbari bo‘ldi. U bir vaqtning o‘zida AQSh Milliy xavfsizlik kengashi a’zosi sifatida faoliyat yuritgan USAIDning birinchi rahbari bo‘ldi. Ilgari u AQShning Birlashgan Millatlar Tashkilotidagi doimiy vakili (2013−2017), Prezident Barak Obamaning maxsus yordamchisi, Milliy xavfsizlik kengashining ko‘p tomonlama ishlar va inson huquqlari bo‘yicha katta direktori (2009−2013) bo‘lgan. U o‘z faoliyatini urush muxbiri sifatida boshlagan, bir nechta kitoblar muallifi va Pulitser mukofoti sovrindori. Time jurnali uni 100 ta eng nufuzli insonlar ro‘yxatiga va Forbes uni sayyoradagi 100 ta eng nufuzli ayol qatoriga kiritgan.
